Konfirmohet zyrtarisht banori i parë i "Big Brother Vip Albania 5".
Ditën e sotme, moderatori i emisionit "Top Talk" në Top Channel, Angelo Haruni, e mbylli emisionin duke dhënë lajmërimin se prej së nesërmes do ta shohim në shtëpinë e Big Brother.
"Sipas rregullave, menjëherë pas këtij momenti do të hyj në izolim total. Pa telefon, pa kontakt, ashtu siç tashmë ndodhen edhe konkurrentët e tjerë, të izoluar në dhomat e tyre. Nga ky çast, loja nis për të gjithë njësoj," u shpreh gazetari në mbyllje të emisionit.
Deri më tani, nëpër portale ka qarkulluar një listë me emrat e disa personazheve që mund të jenë banorët e ardhshëm të shtëpisë. Një pjesë e mirë e tyre u kontaktuan nga moderatorët e UëTëFë Show në Andale Media për të marrë një përgjigje edhe më konkrete.
Kristi Lamaj, këngëtar
"Nuk mund të prononcohem. Le të spekulojnë [mediet]," tha Kristi, duke lënë të hapur mundësinë se do të jetë vërtet konkurrent, duke marrë parasysh se nuk dha një "jo" kategorike.
Renee Reffo, moderatore podkasti
"Nuk kam marrë fare ftesë këtë vit. Nuk do jem pjesë e Big Brother," u shpreh Renne, duke përsëritur se ftesën e ka marrë vetëm në edicionin e kaluar.
Robert Aliaj Dragot, artist
"Këto janë top secret, po tregova sekretin rrezikoj gjithë ato lekë," tha Roberti me humor, duke e lënë sërish të paqartë nëse po i shmangej konfirmimit të lajmit apo thjesht e ironizoi atë.
Juxhin Plovishti, aktor
"Këto bëhen vetëm për zhurmë, ndoshta s'do i thoja 'jo' hyrjes në Big Brother, por s'kam marrë asnjë ftesë," u përgjigj Juxhini, ndonëse burime pranë Top Channel thonë të kundërtën.
Ardit Murataj, moderator
"Jo, jo, jo, nuk ka asgjë të vërtetë. Do e shihni vetë, s'kam për të qenë," u përgjigj pa hezitim Arditi, duke u shprehur se nuk ka marrë as ftesë.
Sabina Mete, moderatore sporti
"Unë nisem për Itali, kam planet e mia, nuk do futem në Big Brother. Jam përfolur sepse më ka ardhur ftesa," tha Sabina, por pa saktësuar se kur kthehet nga Italia. :)
Ina Pashollari, moderatore podkasti
"Nuk mund të flas dot fare për këtë pjesë, kam vetë një emision radioje dhe s'kam folur. Në datën 20 zbulohen të gjitha," tha Ina duke lënë sërish të kuptuar se mund ta shohim si banore.
Kleoniki Delijorgji, modele, moderatore
"Më pyesin të gjithë, por nuk e di. Në datën 20 nuk do futem, për më vonë nuk e di," u shpreh dhe Kleoniki.
Lore, këngëtare
"Do ishte shumë qejf, nëse do futesha, do jepja gjithë ngjyrat. Pra, jo, jo këtë vit. Ftesa ka ardhur, jam duke u menduar," u përgjigj Lore.
Roerd Toçe, aktor
"Janë thjesht lajme, s'kam pasur ftesë nga Big Brother," u përgjigj Roerdi duke i shuar aludimet.
Kostana Morava, gazetare
"Nuk jam, kam plane të tjera për këtë vit, megjithatë ftesën e kam marrë."
Jori Mersin, konsulente imobiliare
"Do e lë surprizë," u përgjigj Jori duke lënë sërish të hapur mundësinë që ta shohim brenda shtëpisë më 20 dhjetor.
Për të tretin vit radhazi, moderator i "BBVA" do të jetë Ledion Liço. Ndërkohë, "Big Brother Fan Club" do të moderohet nga Kiara Tito, ndërsa dy opinionistët do të jenë Françeska Murati e Arian Konomi.
