Në një epokë të mbikonsumit dhe zgjedhjeve të pafundme, trendi i ri “Të duhet vetëm një”, (YONO), sfidon idenë se duhet të kemi shumë gjëra për të qenë të lumtur. Përkundrazi, kjo filozofi sugjeron se lumturia e vërtetë qëndron në kufizimin e nevojave tona dhe zgjedhjen e vetëm "një" gjëje që na shërben vërtet.
Ky trend fokusohet në uljen e shpenzimeve të panevojshme dhe prioritizimin e konsumit thelbësor dhe duket se përputhet me mjedisin aktual të inflacionit të lartë, kurseve të larta të këmbimit dhe normave të larta të interesit, gjë që reflekton pasigurinë e vazhdueshme ekonomike.
“Konsumatorët po i drejtohen gjithnjë e më shumë tregjeve të rrobave apo sendeve të përdorura, duke përdorur biçikleta në vend të taksive dhe duke marrë me qira mobilje dhe pajisje të ndryshme elektronike”, raporton CNN.
Trendi "Të duhet vetëm një" thekson rëndësinë e minimalizmit dhe fokusimin në atë që është vërtet e vlefshme. Në një shoqëri ku mbikonsumimi është normë, YONO duket se na fton të rivlerësojmë prioritetet tona dhe të zbulojmë fuqinë e të pasurit vetëm gjërat thelbësore. Sigurisht, ideja e YONO-s nuk ka të bëjë vetëm me konsumimin apo blerjen e objekteve, por edhe me zgjedhjet tona personale në jetë. Nga marrëdhëniet tona me njerëzit e deri te karriera jonë profesionale, YONO na inkurajon të kërkojmë vetëm atë që është autentike dhe që na përshtatet vërtet.
Si filloi YONO
Sipas një raporti të BBC-së, një nga arsyet e rritjes së trendit YONO është situata e vështirë ekonomike në të cilën është gjetur shoqëria, me ndryshimin e mentalitetit gjatë pandemisë Covid, por tani po ndryshon përsëri pasi po përballet me të tjera sfida.
Pse është kaq popullor?
Popullariteti i trendit mund të shpjegohet me disa arsye. Financat duket se kanë ndikimin e tyre. Sidoqoftë, zgjedhjet më të qëndrueshme që kemi tani në fusha të ndryshme të jetës sonë, nevoja për të kufizuar konsumin dhe dëshira për përvoja më të thjeshta kontribuojnë që YONO të pranohet mjaft shpejt nga shumë njerëz.
Për më tepër, YONO promovon filozofinë që ju mund të gjeni kënaqësi duke pasur vetëm gjërat thelbësore, pa u ndjerë sikur duhet të ndiqni tendencat ose pritshmëritë e të tjerëve. Pra, duket krejtësisht i përshtatshëm për ata që kërkojnë të kontribuojnë në uljen e ndotjes së mjedisit. Duke zgjedhur të blini më pak artikuj dhe me cilësi më të mirë, ju reduktoni gjasat për të kontribuar në sasitë e mëdha të mbetjeve që përfundojnë në oqeane.
Sigurisht, media sociale luan një rol në promovimin e saj. Influencuesit dhe krijuesit e përmbajtjeve që ndjekin stilin e jetesës YONO ose minimale, shpesh e promovojnë këtë filozofi përmes platformave të tyre, si Instagram dhe TikTok. Sidomos në TikTok, ka një valë promovimi të stileve të thjeshta të jetesës dhe ideve rreth lumturisë personale dhe pranimit të "një" si një ideal. Termi po fiton vazhdimisht popullaritet në mediat sociale, me përdoruesit që ndajnë udhëtimet e tyre personale drejt thjeshtësisë dhe ekuilibrit të brendshëm.
Artikuj të sugjeruar:
