Yll Limani ka bërë një njofim zyrtar në llogarinë e Instagramit, duke bërë me dije për gjithë dashamirësit e muzikës së tij se nuk do të performojë më për një kohë nëpër klube nate:
"Për shumë vjet, jemi takuar pothuajse çdo fundjavë në klube të ndryshme, kudo ku ka pasur njerëz që e duan muzikën time. Prania juaj, energjia, afërsia dhe dashuria që më keni dhënë, ma gëzojnë zemrën dhe jam pafundësisht falënderues.
Tani, kam vendosur të ndalem pak. Në vitin 2026 nuk do të mbaj performanca në klube. Jo sepse po largohem nga muzika apo sepse klubet nuk janë pjesë e rëndësishme e historisë sime; klubet janë vendi ku muzika ime është rritur, ku kam kënduar bashkë me ju dhe ku kam kujtime të paharrueshme."
Më tej, Ylli shpjegoi se arsyeja për këtë vendim është sepse disa prej këngëve të tij thjesht nuk janë bërë për klube dhe energjinë që kërkon jeta e natës:
"Disa këngë nuk janë bërë për klube. Disa momente kërkojnë një hapësirë tjetër për t’u ndier ashtu siç duhet. Disa gjëra në jetë kërkojnë kohë. Fokus. Një frymëmarrje tjetër."
Në fund, këngëtari shpjegoi se ky është një vendim i tij i përkohshëm për të krijuar hapësirën e duhur për t'u rritur në nivel krijues:
"Ky është thjesht një vendim për të krijuar hapësirë për diçka më të madhe. Për t’u përgatitur. Për t’u takuar ndryshe.
Faleminderit për çdo natë që e kemi ndarë bashkë deri sot. Shihemi shumë shpejt, ashtu siç ju pëlqen. Ju dua <3"
