Nëse 2020 do të kishte një libër me teoritë konspirative (meqë ra fjala, duhet ta ketë), me patjetër do të vendosnim edhe pretendimin e një përdorueseje të Twitter-it, @mamabethanyjoan, sipas të cilës, këngëtaret me origjinë shqiptare të famshme nëpër botë, si Dua Lipa, Bebe Rexha, Rita Ora apo Ava Max, nuk u bënë të njohura nga talenti, por u promovuan nga mafia shqiptare për pastrim parash dhe të tjera biznese të paligjshme. Ok. Qartë. Disa sekonda derisa ta “përtypim” gjithë këtë informacion.

Vazhdojmë. Sipas @mamabethanyjoan, është e pamundur që një vend me 2.8 milionë banorë, të “shpërthejë” papritur me kaq shumë yje popi. Në “studimin” e saj serioz dhe voluminoz, personi në fjalë harroi të përfshinte emigrantët.

Me përjashtim të atyre që zakonisht besojnë gjithë çfarë lexojnë (ose kanë mendime nacionaliste dhe shfaqin urrejtje ndaj popujve të tjerë), pjesa dërrmuese e njerëzve i konsiderojnë postimet si të pakuptimta, të çuditshme dhe të palogjikshme. Në Instagramin e @anabel_media, disa ndjekës ironizuan:

“Çfarë imagjinate!”, “Si e llogariti buxhetin 5.6 milionë euro të mafias? Në fakt, aq janë vetëm para xhepi”, “Po kush është kjo se që paska fantazi e kuptuam”, “Çfarë konspiracioni”, “Shumë e vërtetë. Tani mafia shqiptare do marrë aksione në bursën e New York-ut dhe do të luajë me ekonominë e shteteve të fuqishme”, “Kush do t'ia shpjegojë gocës se ne jemi 2.8 milionë banorë [vetëm] brenda kufijve?” etj.

Deri tani, e vetmja që ka reaguar është Bebe Rexha, përmes një postimi në Twitter.

“Sinqerisht, kjo është kaq qesharake. Gjithashtu nëse e ke ‘numrin e mafias’ për të cilën thua se na bëri të famshme, a mund të ma dërgosh? Do të publikoj një këngë së shpejti. Ndoshta më ndihmojnë që të ‘siguroj një hit’. Po qesh me lot. Mos hidh poshtë atë për të cilën femrat shqiptare kanë punuar kaq fort.”