Që Stresi është kthyer në “djalë për së mbari”, këtë e ka treguar qartë në intervistat e fundit (lexo këtu).
Duket se është Kejsi, e fejuara e tij, ajo që ka ndikuar shumë që jeta e tij të ndryshojë. Tani, Stresi dhe Kejsi po planifikojnë dasmën që do të mbahet në Santorini, një prej ishujve më të famshëm turistikë.
Por tre vite më parë, me gjasë as njëri as tjetri nuk e merrnin me mend se do të arrinin deri këtu. Ata ishin fqinjë dhe Stresi, si “i pari i lagjes”, u caktua nga mamaja e Kejsit si mbrojtësi i së bijës. Arsyeja kjo pse tani, mamaja e Kejsit s'i flet.
“Nëna e Kejsit më kërkoi të kujdesesha për të bijën pra, ta mbroja nga ngacmimet e djemve të tjerë. Unë, të them të drejtën, e kisha parë në lagje dhe herën e parë që e ftova në kafe, isha në tavolinë me dy shokë.”, rrëfen reperi ekskluzivisht për “Panorama Plus”.
Megjithatë, këtu Stresi e ndjeu kiminë mes tyre:
“U çua para nesh nga tavolina dhe në atë moment, unë u thashë shokëve: “Shikoni a do e kthejë kokën nga unë, se unë nuk do e kthej”. “Po”, më thanë ata, “E ktheu, shikoje!”’
Stresi vendosi mos t’ia varte sepse, e dinte se pas kafesë do t’i shkruante vetë ajo e para. Dhe kështu ndodhi. Kejsi i shkroi në Instagram dhe e falenderoi për kafenë. Lanë takim për ditën tjetër dhe ja ku janë sot, të lumtur e të mbarësuar.
Por jo gjithçka është fushë me lule: Kejsi studion në Kanada dhe u duhet të mbajnë një lidhje në largësi. Siç tregon Stresi, ajo shpesh mërzitet për shkak të stilit të tij të jetesës, pasi frekuenton shpesh jetën e natës. Ajo është shumë xheloze dhe sipas Stresit, ka të drejtë.
“Kërkesa e saj e vetme është: “Të lutem, vetëm telefonin mos e fik!”, pasi ne edhe pse në distancë fizike, jemi gjithë kohën në komunikim me njëri-tjetrin, 24 orë në 24.”
Dhe jo vetëm: Duhet ta ketë të qartë se ku është Stresi në çdo moment të ditës!
“Për momentin e kontrollojmë njëri-tjetrin me GPS, me të cilët lidhemi me smartphone dhe shikojmë çdo lëvizje tonën pra, ku shkojmë dhe çfarë bëjmë. Ishte ideja e saj të instalonim GPS në celularët tanë dhe unë e pranova pa problem.”
