Numri i lartë i rasteve pozitivë këtë javë në vendin tonë, ka bërë që njerëzit të ngrenë pyetje të tipit: "A do të stopojë hapja?", "A ka rrezik për një karantinë të dytë?" 

Një përgjigje për këto dilema e dha ministrja e Shëndetësisë, Ogerta Manastirliu, e ftuar në Opinion. Skenari që do të çonte në një mbyllje të dytë të vendit është nëse në spital ka 80 pacientë të shtruar, por për fat të mirë deri më tani gjendja vijon të jetë e qëndrueshme.

"Kurba vazhdon të jetë e sheshtë. Është akumulativi i rasteve që përcakton ecurinë. Ajo që përcakton kthimin pas. Janë rastet pozitive ditore, janë rastet e të shtruarve, rastet në terapi intensive dhe sigurisht dhe fatalitet. Rastet pozitive të ditëve të fundit janë kontakte të personave të infektuar. Ne aktualisht në Shqipëri kemi mbi 20 vatra kryesisht familjare. 60% e të prekurve janë në Tiranë. Kemi 21 pacientë të shtruar. Është një numër i qëndrueshmëm dhe që nuk ka ndryshuar, në terapi intensive nuk kemi asnjë të intubuar."

Vendi në fillim të qershorit pritet të shkojë drejt hapjes së plotë, me përjashtim të fundjavës së parë të muajit që do të vijojë të jetë e mbyllur. Manastirliu, shtoi se hapat pas do të bëhen në rast se kemi dyfishim ose trefishim rastesh të reja, numër të lartë pacientësh në spital apo 15-20 raste të intubuar.

"Nëse do të kishim dyfishim apo trefishim të rateve të reja, karahasuar  me para 2 javësh. Nëse do të kishim rritje të të shtruarve duke shkuar tek 80 të shtruar dhe nëse do të kishim të intubuar 15 – 20 raste, atëherë ne stopojmë. Nuk bëjmë hapa të tjerë. Nëse kjo na rritet do të bëjmë hapa pas."