Seria e dytë e web-series “Love Likes Tirana” ishte shumë herë më dramatike se pjesa e parë: Pas gjashtë vitesh lidhje, Zoi mëson krejt papritur se i dashuri e tradhton. Nisur nga kjo, realizuam në Anabel.al një sondazh në lidhje me tradhtinë: Si do të reagonit, kë do të bënit fajtor, a do ta falnit etj.

Pjesa më e madhe, rreth 38% do të reagonte njësoj si Zoi në një situatë të ngjashme, ndërkohë që pjesa tjetër do të përballej edhe me personin e tretë, në rastin e “Love Likes Tirana”, Lunën. Ndonëse nuk përjashtohen përleshjet fizike, duket se përballja e parë është dramatike dhe shokuese në të njëjtën kohë.

Në lidhje me fajtorin e një trekëndëshi dashurie, pjesa dërrmuese e votuesve – të paktën nisur nga gjithë ç’panë në serinë e dytë – bën me faj Klajdin.

Falje? Jo, “gjashtë muaj s’janë thjesht seks”.

Në vijim të këtij artikulli, do të bëjmë një përmbledhje të disa nga çështjeve kryesore që lidhen me tradhtinë.

~ Shenjat e tradhtisë: Si ta kuptosh që një i tretë është në jetën tuaj? ~

 1. E kap sërish në gënjeshtër.

Ndonjë nga kolegët e tij u surprizua kur mësoi se partneri juaj është i martuar? Të tha se po del me kolegët ndërkohë që ti e di me siguri që s’është kështu? Diçka nuk shkon këtu. Aq më tepër kur gënjeshtra përsëritet.

2.Nuk interesohet për takimet tuaja në çift dhe as në seks.

Ftohtësia e intimitetit është flamur i kuq. Nëse ai po tradhton, tregon se nevojat seksuale dhe ato emocionale i merr nga dikush tjetër.

3. Krejt papritur ai do orë të tëra për t'u bërë gati.

Përveç rasteve kur del me ty, vini re sa kohë harxhon për t'u bërë gati para se të dalë. Pse vonohet kaq shumë? Kujt do t’i bëjë përshtypje? Interesimi i tepërt dhe i papritur, tregon se interesohet të duket bukur në sytë e dikujt që ju s’e dini.

4. Të bën dhurata dhe komplimenta pafund.

Duket kaq gjest naiv në dukje, por është e vërtetë. Sa më i madh të jetë faji aq më shumë dhurata do të marrësh. Ekspertët thonë se kur partneri tradhtar nuk heq dorë nga lidhja, sillet edhe më mirë me partneren "e ligjshme". “S’e ndaloj dot tradhtinë, por të paktën do sillem mirë me time shoqe.”

5. Ti thjesht e ndjen!

E keni parasysh atë ndjesinë kur e dini që marrëdhënia ka marrë fund? Keni marrë shumë herë sinjale nga partneri, por zgjodhët t’i anashkalonit. Në fakt, intuita është mënyrë efektive për të marrë vendime. Shpesh, e injorojmë intuitën tonë vetëm duke pritur që gjërat që konfirmohen.

~ Dy llojet e tradhtisë, sipas ekspertëve ~

Lloji i parë i tradhtisë në çift është ai me anë të së cilës tradhtari përpiqet të mbushë boshllëqet që i ofron marrëdhënia me partnerin. Për këtë arsye hapet ndaj eksperiencave të tjera, por pa investuar në anën sentimentale. Kjo do të thotë se mënyra e vetme për ta luftuar këtë lloj tradhtie në çift është bashkëbisedimi dhe mbushja e boshllëqeve që mund të ketë marrëdhënia.

Ndërsa lloji i dytë i tradhtisë është disi më i thellë dhe vjen pikërisht në kohën kur njëri nga partnerët në çift nuk mundet ose harron të investojë aq sa duhet në marrëdhënie. Kjo është arsyeja pse tradhtari kërkon medoemos një eksperiencë tjetër, pas së cilës investon edhe anën sentimentale. Mënyra e vetme për t’i bërë ballë kësaj tradhtie është terapia në çift, për të mos arritur kështu deri tek ndarja, që herët a vonë bëhet e pashmangshme.

~ Si të përballeni me tradhtinë ~

Nuk do shumë mend që nuk ekziston ndonjë formulë specifike për të përballuar tradhtinë në çift. Si fillim, duhet thënë se e mira është të ruani qetësinë. Askush nuk ka fituar asgjë pasi ka kryer një veprim pa e menduar mirë. Së dyti, filloni të mendoni atë që dëshironi të bëhet me të ardhmen tuaj. Përpara se të përballeni me personin, duhet që patjetër të mendoni ç’është më e mira për ju.

Përpiquni të shmangni zbulimin e detajeve të hollësishme dhe të panevojshme. Zgjidhni një vend të përshtatshëm për t’u takuar. Nuk këshillohen vendet publike me shumë njerëz; s'kanë përse ta marrin vesh të gjithë ç'po ndodh me ju (Zoi ishte personazh publik, ju jo).

Dëgjoni me kujdes gjithçka që parneri tregon. Ruani qetësinë dhe përpiquni të mos bëni asnjë veprim të nxituar. Në fund, mendoni mbylljen dhe analizoni atë që është më e mira për ju. Zvarritja e gjërave përgjithësisht nuk është e këshillueshme.

Mund të lexoni edhe “As të parët, as të fundit” nga Esther Perel  - një libër për të gjithë ata të cilët kanë tradhtuar, janë tradhtuar apo thjesht kanë nevojë për një mendim ndryshe në lidhje me raportet emocionale; një udhërrëfyes tërheqës dhe një formë bashkëbisedimi mbi tradhtinë në çift. Perel, ndër të tjera, hulumton shkaqet e tradhtisë, pasojat dhe jep gjithashtu një sërë këshillash.

Ju kujtojmë që "Love Likes Tirana" dhe rubrikat e tjera të "Hostel by Anabel" i ndiqni këtu.