Për shumë vende të cilat shtrihen përgjatë Mesdheut, deti është sinonim i të ardhurave pasi gjithë ekonomia e rajonit është bazuar pikërisht aty. Mirëpo viteve të fundit, rrjetat e peshkatarëve nuk kanë grumbulluar më peshq si më parë për disa arsye.
Në një artikull të Euronews.com, shkruhet se rritja e temperaturave të detit dhe peshkimi intensiv ka ushtruar një presion të vazhdueshëm te ekosistemet detare, përfshirë këtu edhe dëmin e makro dhe mikro-plastikës. Artikulli nxjerr në pah se pjesa më e madhe e ndotjes është shkaktuar nga ato që njihen si “rrjetat fantazmë”, rrjetat e humbura të peshkimit që janë grumbulluar në fund të detit Adriatik.
Nisur nga kjo dukuri, u krijua Adrinet, një iniciativë që synon të mbrojë ekosistemet detare dhe t’i japë fund dëmit të rrjetave të braktisura. Në Adrinet, i cili po koordinohet nga Italia, do të marrin pjesë Shqipëria dhe Mali i Zi. Në faqen e projektit, shkruhet se partnerë janë, ndër të tjerë, Universiteti Bujqesor i Tiranës dhe Këshilli i Qarkut Vlorë.
Buxheti i përgjithshëm i projektit është pak më shumë se 1 milion euro, 85% të cilit do të financohet nga politika e kohezionit e Bashkimit Europian, një strategji e BE-së për të promovuar dhe mbështetur zhvillimin e përgjithshëm të shteteve anëtare dhe atyre të rajonit. Pjesa tjetër do të ndahet mes tri vendeve pjesëmarrëse.
Falë një sistemi me radio-frekuencë, mikroçipet mund të vendosen në rrjeta dhe të gjenden nëse humbin. Elisabetta Bonerba, një udhëheqëse e projektit në Adrinet, tha për Euronews se "gjurmueshmëria bën të mundur që peshkatarët të jenë përgjegjës për pajisjet e tyre. Kjo gjithashtu ndihmon autoritetet të gjejnë ata që janë përgjegjës për çdo rrjetë të braktisur në det".
Pietro Vicedomini, Komandant i Përgjithshëm i Rojeve Bregdetare Italiane tha se nëse bëhen llogaritë, "gjashtë tonë rrjeta peshkatarësh janë rreth 200 mijë shishe plastike në det".
