1.Nuk ke se ku të ankohesh.
Të mbrosh të drejtën tënde është një ndër të drejtat themelore të njeriut, por mesa duket, jo gjithmonë kjo është e mundur. Në universitetet shqiptare mungon një “zyrë” e posaçme ankesash.
‘Kam hasur në arrogancën e shumë prej pedagogëve, por kurrë nuk e gjeta vendin e duhur ku të ankohesha. Nëse shkoja në sekretari, më dërgonin te dekani dhe nëse shkoja te dekani, ai më dërgonte sërish në sekretari.”- tregon Jola Lola nga Fakulteti Psikologjisë, Elbasan
‘Të jesh student në universitetet publike është sfidë e vërtetë. Një ndër pedagogët e mi i trajtonte studentët në mënyrë jo të barabartë, që dukej hapur dhe shumë qartë. Kjo gjë, dita-ditës më bënte të ndihesha shumë keq, por nuk dija ku ta çoja ankesën time.’-tregon Ori Ola Ola.
‘Në shumicën e vendeve evropiane ka rrugë dhe vende të ndryshme ku shpreh ankesat, ndërsa në fakultetet tona jo. Të takosh dekanin në fakultetin tim është njësoj si të shkosh në Honolulu e të kthehesh. Fillimisht m'u desh të takoja sekretaren e dekanit të cilën e prita mbi gjysmë ore. Gjithsesi fundi ishte i hidhur sepse edhe pse lashë një takim me dekanin, nuk e takova dot kurrë për shkak të mijëra angazhimeve të tij.’ -Erjon.K
2.Sekretaret, "Dekanet” e fshehta të fakulteteve.
Nëse mendoni se në krye të një fakulteti publik shqiptar është dekani, e keni shumë gabim. Në krye janë SEKRETARET.
‘U futa në provim dhe në ditën e caktuar mora notën që ma dorëzoi vetë pedagogu i lëndës. Deri në momentin kur m'u lajmërua nga sekretarja se për shkak të një gabimi të saj, të cilin e quante njërëzor, më duhej të jepja edhe njëhërë provimin. Sekretarja kishte harruar të hidhte notën dhe tashmë duhet të ripërsëris provimin.’-komenton Ela
‘Sekretaret në Fakultetin e Drejtësisë janë shumë arrogante. Kam frikë të pyes për diçka sepse përgjigja që do marrë, nuk do jetë e hijshme. Të shumta janë raste që më është përplasur dera në fytyrë si përgjigje e ndonjë kërkese mëse normale nga ana ime.’-Emir
‘Nëse duhet të flas për sekretaret në fakultetin tim më duhen ditë të tëra, por ajo që më mërzit së tepërmi, është pritja e gjatë pas xhamit për të marrë një përgjigje. Jam e lodhur nga kjo sjellje, por skam ç’të bëj.’-anonim nga Fakulteti i Shkencave të Natyrës.
3.Vonesat e pedagogëve.
Nuk ka ‘dhimbje’ më të madhe se të lësh shtratin e ngrohtë në një ditë dimri dhe pedagogu mos të shfaqet për arsye të ndryshme. Kjo është një ndër ato gjëra që përsëriten më shpesh në fakultete.
‘Nuk je një student i vërtetë nëse nuk ke pirë një kafe te vetme pranë fakultetit, pasi pedagogu nuk është paraqitur për mësim. Gjithmonë vonesat kanë qënë prezente në Fakultetin e Ekonomisë.’-Arbëri
‘Një ndër pedagoget më të njohura pothuajse nuk paraqitej fare në leksionet përkatese në Fakultetin e Histori-Filologjisë. Për shkak të angazhimeve të saj mund të ishin prezent asistentët në disa raste, por në shumicën e rasteve, mësimi nuk kryhej. Unë si studente do të dëshiroja titullaren dhe jo asistentët e saj.’- Erisa.L, Fakulteti i Shkencave Sociale
‘Në Fakultetin e Mjekësisë pedagogët janë shumë të angazhuar. Disa prej tyre punojnë në spitalin publik, por dhe në ato private, duke mos i dhënë vëmendje dhe kohën e duhur rolit të tyre si mësimdhënës.’-Megi
4.Të rishikosh tezën e provimit është një mision i pamundur.
Mendoja se ‘Misioni i Pamundur’ i përkiste vetëm aktorit Tom Cruise, por nuk qenka kështu:
‘Jam kthyer në një ‘armike’ të dijeve të pedagoges sepse kërkova të rishikoja tezën; nuk isha e bindur për notën që kisha marrë.’-Alba Alba
‘Jo në të gjitha lëndët sepse nuk dua të tregohem përgjithësuese, por në disa lëndë të caktuara, të rishohësh tezën e provimit, është një mision i pamundur.”-LoveIna
‘Kërkova me ngulm të rishoh tezën pasi kishin dalë rezultate përfundimtare, por përgjigja që mora, ishte një jo. Pa asnjë argument, apo arsye. Thjesht një JO!’-Klodi
5.Mungon praktika.
Të praktikosh do të thotë të ushtrosh dhe të vendosësh në jetë dijet e tua. Por a aplikohet praktika në universitetet shqiptare?! Apo asaj i jepet një rëndësi e dorës së dytë?
‘Kur nisa Fakultetin e Drejtësisë mezi e prisja periudhën në të cilën do t'i nënshtrohesha praktikës. Çdo serial që kisha parë, çdo dije që kisha marrë tashmë, do t'i hidhja në praktikë. Por nuk ndodhi, pasi shkolla ime nuk ofron praktikë as në ciklin e parë të studimeve dhe as në të dytin, ndërkohë që kam zgjedhur të vazhdoj masterin shkencor në këtë fakultet.”-Luiza
“Edhe pse pretendohet që masterit profesional në Fakultetin e Drejtësis i jepet mundësia për të bërë praktikë, kjo nuk është e vërtetë. E rëndësishme është vetëm të dorëzosh një dëshmi në fund që tregon që ke bërë praktikë. Asgjë më shumë.’-Elda Lela
