Përmes një videoje në profilin e saj në Youtube, Rita Ora ka sjellë gjithë momentet e koncertit në Kosovë me rastin e 10-vjetorit të Pavarësisë dhe për gjithë ne kureshtarët, ja ç'ndodhi fije për pe.
Videoja 15 minutëshe është një përmbledhje e momenteve nga nisja entuziaste e Ritës për në Kosovë deri në përfundim të koncertit.
“Kosovë, ishte e paharrueshme dhe jam mirënjohëse që performova në shtëpi. Faleminderit të gjithëve e ju vlerësoj pa masë”, ka shkruar ylli i muzikës në Instagram.
Në videon e shkurtër, Rita sjell pjesë nga takimi i saj me familjarët, diskutimi me kryeministrin Ramush Haradinaj për të ardhmen e Kosovës, momentet para performancës, vallen e Shotës në skenë dhe emocionet pas koncertit. “Nuk kam parë kurrë kaq njerëz në rrugë sa sot. S’mund ta besoj dhe nuk di ç’të bëj”, janë disa nga fjalët e Ritës përpara koncertit.
“Nuk ka gjë më të bukur se të kthehesh dhe të tregosh mbështetje për vendin që është kaq krenar për ty. Jam krenare për veten që kam punuar fort dhe jam e lumtur që më në fund ia arritëm ditës që Kosova të ishte në hartën e botës”, shprehet Rita duke iu referuar Kosovës në hartë si shtet i pavarur.
