Prokurorja e Përgjithshme e Shteteve të Bashkuara, Pam Bondi, tha të martën se ajo i ka udhëzuar prokurorët që të kërkojnë dënimin me vdekje për Luigi Mangione-n për vrasjen e CEO-s të UnitedHealthcare, Brian Thompson, duke mbajtur premtimin e fushatës së presidentit për të rikthyer dënimet me vdekje.
Kjo shënon herën e parë që Departamenti i Drejtësisë ka kërkuar të sjellë dënimin me vdekje që kur presidenti Donald Trump u kthye në detyrë në janar duke u zotuar që, ndër të tjera, të rifillojë ekzekutimet federale, të cilat u ndaluan nga administrata e mëparshme.
“Vrasja e Brian Thompson nga Luigi Mangione – një burrë i pafajshëm dhe baba i dy fëmijëve të vegjël – ishte një vrasje e paramenduar, gjakftohtë që tronditi Amerikën,” tha Bondi në një deklaratë. Ajo e përshkroi vrasjen e Thompson si "një akt dhune politike".
Luigi Mangione, një 26-vjeçar i diplomuar në Ivy League nga një familje e njohur e pasurive të paluajtshme në Maryland, përballet me akuza për vrasje federale dhe shtetërore pasi autoritetet thonë se ai vrau Brian Thompson, 50 vjeç, jashtë një hoteli në Manhattan më 4 dhjetor, ndërsa ekzekutivi mbërriti për konferencën vjetore të investitorëve të UnitedHealthcare (kompani amerikane fitimprurëse e specializuar për sigurimet shëndetësore).
Avokatja e Luigi-t tha të martën se duke kërkuar dënim me vdekje, drejtësia amerikane ka kaluar në nivele barbare.
Kush është Luigi Mangione?
Luigi Mangione mund të ishte personi i fundit që shoqëria apo familja mendonin se do të përfshihej në një krim.
Djali i një familjeje të njohur nga Maryland, i cili mbaroi me rezultatet më të mira të klasës në një shkollë private elitare para se të diplomohej në një nga universitetet më prestigjioze në botë, dukej se kishte një jetë që shumë e lakmonin dhe asnjë motiv për ta rrezikuar atë, sipas miqve.
Por gjithçka ndryshoi kur ai u arrestua për vrasjen e Brian Thompson, drejtorit ekzekutiv të UnitedHealthcare.
Mangione dyshohet të jetë motivuar nga mllefi ndaj asaj që ai e konsideronte “kompani shëndetësore parazitare”. Ai kishte kaluar kohë në një komunitet surfistësh në Hawaii, por ishte larguar për shkak të dhimbjeve të forta në shpinë, thonë ata që ishin me të sipas mediave ndërkombëtare. Megjithatë, nuk dihet ende deri në çfarë mase problemet shëndetësore ndikuan në pikëpamjet e tij për industrinë mjekësore.
Pas vrasjes, ai vijoi jetën si normalisht. Mangione u arrestua në një McDonald’s në Pennsylvania, dhe dyshohet se kishte një armë, municion, disa ID të rreme dhe para.
Ai gjithashtu kishte një dokument të shkruar që shprehte urrejtje ndaj korporatave dhe përmbante pasazhe të tilla si “sinqerisht, këta parazitë e meritonin”, sipas policisë. Hetuesit thonë se fjalët “refuzo”, “mbro” dhe “heq” ishin shkruar mbi fishekë që u gjetën në vendin e krimit, dhe dyshohet se janë një referencë për taktikën që përdorin kompanitë për të refuzuar kërkesat e pagesave nga pacientët.
