Mini-seriali me katër episode “Adolescence”, që rrëfen historinë e një djali adoleshent të akuzuar për vrasjen e një shoqeje të klasës, ka ngjallur shumë diskutime mes shikuesve dhe tashmë ka hyrë në listën Top10 të Netflix-it. Për shkak të historisë gjithëpërfshirëse dhe temës delikate, nuk është për t’u çuditur që shumë shikues pyesin nëse “Adolescence” është e bazuar në ngjarje të vërteta apo personazhe realë.
Në vend që të bazohej në një krim të veçantë apo në një person të vetëm, një sërë lajmesh tronditëse çuan në krijimin e “Adolescence”. Bashkëkrijuesi, bashkëskenaristi dhe aktori kryesor, Stephen Graham – i cili luan rolin e Eddie-t, babait të Jamie-t në serial – tha për The Independent: “Lexova një artikull për një djalë të ri që kishte therur me thikë një vajzë të re...Dhe pastaj, ndoshta disa muaj më vonë, në lajme u raportua për një tjetër djalë të ri që kishte therur një vajzë. M’u thye zemra.”
Sipas një raporti të vitit 2024 nga Kombet e Bashkuara, rreth 736 milionë gra – pothuajse një në tre – kanë përjetuar dhunë, fizike dhe/ose seksuale, ose të dyja, të paktën një herë në jetën e tyre.
Më 13 mars, ditën kur “Adolescence” u shfaq premierë në Netflix, një djalë adoleshent u dënua me 23 vjet burg sepse goditi me thikë për vdekje një vajzë 15-vjeçare në Londër në vitin 2023. Në SHBA, një rast i ngjashëm në Florida u bë kryefjalë në vitin 2023, kur një djalë adoleshent u dënua me burgim të përjetëshëm pasi theri me thikë një vajzë 13-vjeçare.
Krijuesit e serialit donin që shikuesit të ndiheshin sa më të lidhur me historinë dhe personazhet. “Mund të kishim bërë një dramë për bandat dhe krimet me thikë, ose për një fëmijë me një nënë të alkoolizuar apo një baba të dhunshëm,” tha Graham për Tudum. “Por, në vend të kësaj, donim që shikuesit ta shihnin këtë familje dhe të mendonin: ‘O Zot. Kjo mund të ndodhë edhe me ne!’ Ajo që shfaqet këtu është makthi më i keq i një familjeje të zakonshme.”
Në vend të prindërve të tij, është interneti dhe disa grupe radikale që kanë ndikim te Jamie. Graham u frymëzua duke parë ndërveprimet e djalit të tij me miqtë dhe përdorimin e rrjeteve sociale.
“Kur isha fëmijë, nëse isha në dhomën time, mamaja e dinte që isha i sigurt... Por në ditët e sotme, këto telefona janë shumë të rrezikshëm. Dhe këta të ashtuquajtur ‘influencerë’ mbajnë një përgjegjësi të madhe,” tha aktori për GQ.
Bashkëkrijuesi Jack Thorne beson se duhet të ndërmerren më shumë veprime kur bëhet fjalë për aksesin e të rinjve në materiale mizogjene dhe potencialisht të dhunshme në internet, duke thënë për The Guardian, "Prindërit mund të përpiqen ta rregullojnë këtë. shkollat mund të ndalojnë aksesin në celular, por duhet bërë më shumë. Duhet të ketë mbështetje nga qeveria sepse idetë që shprehen janë të rrezikshme në duart e gabuara dhe truri i të rinjve është lehtësisht i manipulueshëm.”
