Shfaqja e Bad Bunny-t gjatë Super Bowl-it pritet të mbahet mend për një kohë të gjatë. Por, përpos reagimeve pozitive, kishte edhe të tjerë që nuk e pritën fare mirë mënyrën se si u organizua i gjithë spektakli. Një ndër ta ishte pikërisht presidenti i SHBA-së, Donald Trump. Në një postim në Truth Social, Trump shkroi:
“Shfaqja e Super Bowl-it është absolutisht e tmerrshme, një nga më të këqijat, NDONJËHERË!”
Presidenti e cilësoi performancën një “fyerje ndaj Madhështisë së Amerikës” dhe pretendoi se ajo “nuk përfaqëson standardet tona të suksesit, kreativitetit apo ekselencës”, pa shpjeguar më tej arsyet.
Trump u ankua gjithashtu se pjesa më e madhe e performancës ishte në spanjisht, duke thënë:
“Askush nuk kupton asnjë fjalë nga ajo që thotë ky tipi.”
Pa dhënë detaje, ai e konsideroi kërcimin gjatë shfaqjes si të neveritshëm, veçanërisht për fëmijët e vegjël që po e shikonin.
Më pas, Trump lavdëroi sukseset e administratës së tij dhe tha se performanca e Bad Bunny-t ishte një “shuplakë në fytyrë” për këto arritje. Në postimin e tij, Trump nuk shpjegoi konkretisht arsyet e kritikave. Kjo ndodhi, ndonëse këngëtari nuk e përmendi në asnjë moment presidentin apo administratën e tij gjatë shfaqjes.
Performanca e Bad Bunny-t arriti të marrë përmasa historike. Ai është këngëtari i parë që zgjedh të performojë thuajse vetëm në spanjisht gjatë shfaqjes. Reperi u sigurua të organizonte një spektakël që përfaqësonte prejardhjen e tij më së miri.
Reagimet pozitive erdhën jo vetëm nga bashkëatdhetarët e reperit, por edhe nga të tjerë, të cilët edhe pse nuk e njihnin kulturën e Puerto Rico-s, e adhuruan atë.
