Foto: Mbreti Charles, ish-Princi Andrew/ Reuters

Mbreti Charles ka publikuar një deklaratë të rëndësishme në lidhje me vëllain e tij, ish-Princin Andrew. Mes lajmeve se Policia e Thames Valley po heton një ankesë, sipas së cilës Andrew Mountbatten-Windsor dyshohet se ka ndarë informacione konfidenciale, të lidhura me rolin e tij si përfaqësues tregtar, me Jeffrey Epstein, Pallati Buckingham publikoi një njoftim ku shprehet se është i gatshëm të bashkëpunojë me autoritetet.

Kjo deklaratë trajton për herë të parë edhe “sjelljen” e vëllait të Mbretit, që prej momentit kur Andrew dhe ish-bashkëshortja e tij, Sarah Ferguson, u përmendën disa herë në dosjet më të fundit të Epstein, të publikuara nga Departamenti i Drejtësisë.

“Mbreti e ka bërë të qartë, me fjalë dhe përmes veprimeve që nuk ishin ndërmarrë më parë, shqetësimin e tij ndaj akuzave që vazhdojnë të zbulohen në lidhje me veprimet e zotit Mountbatten-Windsor”, thuhet në deklaratën e publikuar nga pallati mbretëror.

Më tej, në deklaratë thuhet se, sa u takon akuzave dhe pretendimeve ndaj ish-princit, është vetë ai që duhet të japë një përgjigje. Ndërkohë, familja mbretërore ka shprehur gatishmërinë për të ofruar gjithë mbështetjen e nevojshme.

“Siç është thënë edhe më parë, mendimet dhe mbështetja e familjes mbretërore ka qenë dhe mbetet me viktimat e çdo forme abuzimi”, përfundon deklarata.

Në tetor të vitit të shkuar, Mbreti Charles i hoqi vëllait të tij, Andrew, titujt mbretërorë “Duka i Jorkut” dhe “Princ”. Sipas një deklarate të publikuar në atë kohë, këto masa u konsideruan të domosdoshme, pavarësisht faktit se ish-Princi i mohonte akuzat.

Ky veprim erdhi pas kritikave për lidhjet e ish-Princit Andrew me Epstein, i cili vdiq në burg në vitin 2019, ndërsa priste gjykimin. Deklarata e Pallatit Buckingham u publikua vetëm disa orë pasi Kate Middleton dhe Princi William shprehën mbështetjen e tyre për viktimat e Epstein.

Andrew u tërhoq nga roli i tij publik mbretëror në vitin 2019, pas intervistës së bujshme për BBC-në, ku foli për marrëdhënien e tij me Epstein. Mbretëresha Elizabeth i hoqi djalit të saj titujt ushtarakë dhe ata mbretërorë disa vite më vonë, pasi një gjykatës hodhi poshtë përpjekjen e tij për të rrëzuar padinë për sulm seksual, të ngritur nga viktima e Epstein, Virginia Giuffre. Andrew i ka mohuar vazhdimisht akuzat e saj dhe të dy arritën një marrëveshje në vitin 2022.