Partnerja e stilistit të ndjerë, Rina Maloku duket se po i rikthehet jetës sociale, pak muaj pasi partneri i saj ndërroi jetë si pasojë e vetëvrasjes.
Ditën e djeshme ajo ka publikuar një shprehje në Instagram, ku qartazi shpreh se përpos çdo gjëje që kaloi, vazhdon të qëndrojë e fortë.
"Sado e fortë të jetë era, mali nuk dorëzohet," shkruhet në foto.
Por, ky rikthim është shoqëruar me një tjetër veprim prej saj. Fotot krah partnerit të ndjerë, Festim Isufit janë fshirë.
Në 9 maj të vitit të shkuar, në “Rrugën B” në Prishtinë, Rina Maloku u plagos nga bashkëshorti.
Sipas informacioneve zyrtare, pas një përplasjeje mes çiftit, ai goditi me thikë partneren dhe më pas kreu vetëvrasje në rrethana të cilat ende po hetohen.
Fill pas ngjarjes, Rina reagoi publikisht përmes një postimi të shkurtër ku ndante dhimbjen për humbjen e papritur të njeriut me të cilin ndante jetën:
“Prehu i qetë jeta ime! Humbja jote e papritur na ka lënë me dhimbje të papërshkrueshme. Të dua e do të të kujtoj si njeri të mirë, të buzëqeshur si ishe.”
Mbi ngjarjen tragjike reagoi edhe vëllai i të ndjerit, Lulzim Isufi, gjatë një interviste për “Kosova Today”. Ai u shpreh se dyshonte që në ngjarje mund të ishte përfshirë edhe një person i tretë.
“Sipas informatave që kam vetë unë personalisht, pa Prokurori, pa asgjë, me sa e di unë, këtu është i përfshirë një i tretë. Ama pa qenë 100% i sigurt, nuk mund të them më shumë”, u shpreh ai.
Por, asgjë nuk ishte e sigurt, pasi familja e tyre ende nuk kishte marrë raportin e autopsisë, përmes të cilit do të zbulonin edhe shkakun e vdekjes. Po ashtu, Lulzim Isufi shtoi se edhe hetuesit e dinin se kishte një tjetër person të përfshirë në ngjarje.
“Akoma nuk e kemi marrë raportin e autopsisë. Nuk ka asgjë të sigurt, nuk kemi marrë asgjë. Besoj që edhe Prokuroria e di që ka edhe të tjerë të përfshirë. Ne nuk i përzihemi prokurorisë çfarë bën, por me sa kam informacion, është edhe një i tretë i përfshirë. Kam thënë që po dyshoj, por tani në bazë të informacioneve që kam, po besoj që kjo është e sigurt,” shtoi ai.
Megjithatë, dinamika e ngjarjes është ende nën hetim, ndaj nuk dihet saktësisht se si ka ndodhur tragjedia.
