Numërimi i votave të shqiptarëve po vjen drejt fundit dhe rezultatet tregojnë një fitore të thellë të Partisë Socialiste, e cila deri më tani numëron 82 mandate në parlament. Megjithatë, edhe pse humbja është e thellë, sërish kryetari i PD, Sali Berisha, në një konferencë për shtyp, u shpreh se nuk do e pranojë rezultatin e zgjedhjeve 2025.
Ai i cilësoi zgjedhjet si “më të manipuluarat në historinë e pluralizmit në Shqipëri”, duke akuzuar se janë blerë votat, janë përdorur patronazhistët, kanë ndërhyrë grupe kriminale dhe janë angazhuar banda për të ndryshuar vullnetin e zgjedhësve.
“Zgjedhjet e 11 majit janë zgjedhje të grabitura, të plaçkitura dhe të dhunuara. Asnjëherë më parë, banditët nuk kanë pasur më shumë përfaqësues në parlament sesa këtë herë. Zgjedhjet e 11 Majit u karakterizuan nga blerja publike më masive në tërë historinë e zgjedhjeve në Shqipëri. Zarfi me 100 euro, i dërguar në mes të fushatës elektorale dhe amnistia prej 200 milionë euro gjoba dhe kamata nga viti 2015 deri në vitin 2025, është blerja publike më e fuqishme që ka ndodhur në historinë e vendit”, u shpreh ai.
Më tej, vijoi:
“Punësimi, punë për votë, u aplikua masivisht në këto zgjedhje. Sistemi kriminal i patronazhistëve, i futur në strofulla ose rreth qendrës së votimit, ishte një polici terroriste, ndaj zgjedhësve shqiptarë”.
Ai u shpreh gjithashtu se rreth qendrave të votimit kishte edhe patronazhistë:
“Patronazhistët rreth qendrave të votimit krijuan një atmosferë terrori për zgjedhësit shqiptarë,” përfundoi Berisha.
Ndërkohë, Edi Rama nuk ka preferuar të komentojë rezultatin, duke thënë se po pret të mbarojë.
Deri më tani, rezultatet e votave, sipas Euronews janë:
Partia Socialiste (PS) – 688,284 vota (52.06%)
PD-ASHM – 456,130 vota (34.50%)
Partia Mundësia – 38,947 vota (2.95%)
PSD – 45,757 vota (3.46%)
Nisma Shqipëria Bëhet (NISMA-SHB) – 46,304 vota (3.50%)
Lëvizja Bashkë – 18,274 vota (1.38%)
KEA – 17,844 vota (1.35%)
Djathtas për Zhvillim (DZH) – 5,151 vota (0.39%)
Aleanca Kombëtare Shqiptare (AKSH) – 2,501 vota (0.19%)
Lëvizja Atdheu (LA) – 1,925 vota (0.15%)
Aleanca Demokracia e Re (ADR) – 932 vota (0.07%)
