Lisa, këngëtarja e grupit K-pop Blackpink, u bë objekt i një debati viral pas paraqitjes në Met Gala 2025. Interneti shpërtheu me komente dhe pyetje, teksa shumë përdorues spekuluan nëse figura te të brendshmet e saj ishte ikona e të drejtave civile, Rosa Parks. Përgjigjja është jo.

Një përfaqësues i artistit Henry Taylor, i cili bashkëpunoi me Pharrell Williams për këtë koleksion të Louis Vuitton, konfirmoi për Vulture se figura në veshjen e Lisa-s nuk është Rosa Parks, por një fqinj i artistit. “Të gjitha fytyrat në këtë veshje, si edhe në të tjerat që përfshijnë veprat e Taylor, janë marrë nga jeta e tij personale - miq, anëtarë të familjes dhe fqinj,” tha përfaqësuesi. “Asnjë nga personazhet e përfshira nuk është Rosa Parks apo ndonjë figurë historike e njohur nga kultura afro-amerikane.”

Veshja u krijua si pjesë e koleksionit debutues të Pharrell për Louis Vuitton në vitin 2023, ku piktori Henry Taylor ofroi punimet e tij origjinale.

Megjithatë, kritikat për Lisa-n vazhdojnë. Tema e Met Gala këtë vit ishte “Superfine: Tailoring Black Style”, një homazh për stilin e komuniteteve afro-amerikane. Thënë kjo, për shumë njerëz në internet, prezenca e Lisa-s u pa me dyshim, sidomos për shkak të disa polemikave të mëparshme.

Në rrjet kanë qarkulluar video që pretendojnë se Lisa dhe anëtare të tjera të Blackpink kanë përdorur fjalën e ndaluar me konotacion racist, n*gga, gjatë performancave të tyre të dikurshme. Grupi nuk e ka komentuar publikisht këtë çështje.

Për më tepër, në vitin 2017, Lisa përdori frazën “You gon’ finna catch me” në një performancë (formë dialektore që përdoret kryesisht nga afro-amerikanët në SHBA) dhe në vitin 2021 kërkoi falje pasi u akuzua për përvetësim kulturor në lidhje me përdorimin e gërshetave (box braids) në një klip muzikor.

Artikuj të sugjeruar: