Instagram do të heqë nga platforma gjithë filtrat që promovojnë kirurgjinë plastike, pasi përdoruesit janë të shqetësuar se dëmtojnë shëndetin mendor të njerëzve.

Efektet që i bëjnë njerëzit të duken sikur kanë fryrë buzët, kanë injektuar fillera apo i janë nënshtruar një tërheqjeje fytyrë do të jenë disa nga filtrat që do të ndalohen.

Një sërë studimesh kanë zbuluar se këta filtra që ndryshojnë fytyrën i bëjnë përdoruesit të ndihen keq për mënyrën si duken. Instagram tha se ndalimi i këtyre filtrave promovon mirëqenien.

“Po rivlerësojmë politikat tona – duam që filtrat të jenë një përvojë pozitive për njerëzit,” tha një zëdhënës. “Teksa rivlerësojmë politikat tona, do të heqim gjithë filtrat që i përngjajnë kirurgjisë plastike, do të ndalojmë aprovimin e filtrave të tillë në të ardhmen dhe do të eleminojmë filtra të rinj që i kanë shpëtuar procesit në momentin e parë që raportohen.”

Në gusht, një përditësim i Instagramit iu dha përdoruesve të drejtën për të krijuar filtrat e tyre që aplikohen mbi foto dhe video. Disa nga këta filtra, si Plastica, imitonin rezultatet e operacioneve plastike.

Një tjetër, i titulluar FixMe, tregonte si e shënjon fytyrën e një pacienti kirurgu plastik para operacionit.

Krijuesi i këtij filtri, Daniel Mooney, tha për BBC: “FixMe supozohet të ishte një kritikë e operacioneve plastike, pasi tregon sa i pahijshëm është si proces, me shenja dhe nxirje. Nuk synoja të krijoja një imazh perfekt, si mund ta shihni në rezultatin përfundimtar. Perfeksioni është i mbivlerësuar.

“E kuptoj qëllimin e Instagramit, por për sa kohë njerëzit më të ndjekur në Instagram janë ‘përmirësuar’ rëndshëm nga operacionet plastike, heqja e filtrave që imitojnë efektet s’ka për të bërë ndonjë ndryshim madhor.”

Instagram nuk e di sa kohë do të duhet për të hequr gjithë filtrat nga platforma, por shumë përdorues e duartrokitën iniciativën.

Burimi: BBC