Në këngën e saj më të fundit, labirintin – një rrjet i ngatërruar kalimesh e shtigjesh, të mbi e nëndheshme, nëpër të cilin vështirë të gjendet rruga e daljes – Loredana e krahason me shtëpinë e saj. “Po ndriçoj aq shumë sa ata që më kanë inat po verbohen/ Zinxhirë dhe unaz diamanti/ Shtëpia ime e re si një labirint/ Po dyfishoj fitimin,” këndon ajo në një pjesë.
Në një tjetër pjesë, reperja i drejtohet nënës, të cilës i kërkon që të mos shqetësohet, pasi “po jeton ëndrrën e saj”. Po kështu nuk mungojnë as përmendja e makinave të shtrenjta si Rolls-Royce Phantom apo Lamborghini, që shkojnë për shtat me jetën e saj: “Jeta ime është highclass, si dizajnerët italianë”. Sigurisht që në tekst përmenden çantat e mbushura me para dhe armët.
“Labyrinth”, një produksion i Miksu dhe Macloud, është pjesë e albumit të reperes “King Lori” dhe momentalisht numëron më shumë se 1 milion klikime. Përpos komenteve pozitive, nuk kanë munguar në YouTube komentet që i referohen rastit të bujshëm duke përmendur Petra-n (gruaja që thuhet se u mashtrua dhe kërcënua nga Loredana).
Komente të tilla u vunë re edhe kur reperja postoi një foto e veshur me një xhaketë Louis Vuitton.
