Në një lidhje ekskluzive për ANDALE Media në emisionin UëTëFë Show, të rinjtë folën drejtpërdrejt me Olsi Sulejmanin, menaxherin e përfaqësueses shqiptare në Eurovision, projektin e shumëpërfolur Shkodra Elektronike.
Sulejmani konfirmoi se përgatitjet për natën e madhe janë në rrugën e duhur – me një përkushtim të veçantë ndaj detajeve teknike dhe artistike.
“Prova e tretë dhe finale ka shkuar shumë mirë”, deklaroi ai, duke nënvizuar se fillimet nuk kanë qenë pa sfida. Problematikat teknike si dritat dhe mikrofonët u identifikuan në fazat e para, por, siç tha menaxheri, “është punuar intensivisht që gjithçka të jetë në nivelin më të lartë të mundshëm”.
Një nga elementët më intriguese të performancës është skenografia: një strukturë kubike që, menaxheri konfirmoi se “përfaqëson planimetrinë e parë nga sipër të spitalit psikiatrik të Shkodrës”. Një zgjedhje e guximshme, konceptuale, që hyn në dialog të thellë me narrativën e performancës.
Në skenë, ndarja mes Beatriçes dhe Kolës nuk është thjesht një vendosje koreografike – ajo simbolizon dualitetin midis ëndrrës dhe realitetit. Ky element artistik konfirmon risinë dhe vizionin që ky projekt sjell në Eurovision këtë vit.
Së fundmi, u prek edhe një temë që ka qarkulluar në media: aludimet për një buxhet rekord prej 150 mijë eurosh për pjesëmarrjen e Shqipërisë në Eurovision.
Menaxheri i Shkodrës Elektronike i hodhi poshtë këto pretendime si të pavërteta, duke thënë se shifra prej 150 mijë eurosh nuk është më e larta në historinë e Shqipërisë.
“Buxhetet miratohen shumë më herët, përpara se të dihet kush fiton Festivalin e RTSH-së. Buxheti ka qenë i njëjtë me 5-6 vitet e fundit – me rritje vjetore prej 5-10 mijë euro. Për këtë vit, buxheti shkoi rreth 160 mijë euro dhe kemi shpenzuar rreth 140”, u shpreh ai me transparencë.
Telefonata u mbyll me një përshëndetje të ngrohtë edhe nga vetë Beatriçe, e cila mes emocionesh na tregoi se mezi pret të ngjitet në skenë.
Shqipëria do të performojë në natën e parë të gjysmëfinales së Eurovisionit, më datën 13 maj, e 12-ta në renditje.
Telefonata e plotë:
Artikuj të sugjeruar:
