Iran/ Arrestohen 20 persona pasi dyshohet se janë spiunë të Izraelit
Irani ka arrestuar 20 njerëz që dyshohen se janë pjesë e spiunazhit të Izraelit, Mossad. Hetuesit iranianë kanë bërë me dije se personat e arrestuar kanë bashkëpunuar me inteligjencën izraelite gjatë muajve të fundit.
Gjatë javës së kaluar në Iran u ekzekutua një shkencëtar bërthamor, i cili u dënua për spiunazh në emër të Izraelit. Ai supozohej se ndau të dhëna për inteligjencën izraelite, së bashku me një tjetër shkencëtar bërthamor, i cili vdiq gjatë sulmeve ajrore të Izraelit në qershor.
Bisedimet për paqen mes Rusisë & Ukrainës: Flet Zelensky
Volodymyr Zelensky, presidenti i Ukrainës, reagoi pas deklaratës së presidentit amerikan, Donald Trump, se do të takohet me Vladimir Putin në Alaska për të diskutuar për luftën në Ukrainë. Sipas Zelensky-t, nuk do të pranohet as edhe një marrëveshje që përfshin lëshimin e territoreve ukrainase, për të arritur paqen.
“Sigurisht, ne nuk do t’i japim Rusisë çmime për atë që ka bërë. Populli ukrainas meriton paqe. Përgjigja për çështjen territoriale të Ukrainës është tashmë e shprehur në Kushtetutën e Ukrainës. Askush nuk do të devijojë nga kjo! Askush nuk do të jetë në gjendje ta bëjë këtë. Ukrainasit nuk do t’ia dhurojnë tokën e tyre pushtuesit”, u shpreh ai, duke shtuar se Ukraina ka nevojë për vendime të vërteta, të cilat do të sjellin paqen dhe përpjekjet për të bërë një marrëveshje që nuk përfshin prezencën e Ukrainës, janë të papranueshme dhe joefektive.
Njohja e Palestinës si shtet sovran/ Reagon administrata e Trump
Administrata e Donald Trump në Uashington ka thënë se nuk e ka në plan të njohë shtetin palestinez dhe se e konsideron primare shkatërrimin e Hamasit, i cili është cilësuar si organizatë terroriste.
Zëvendëspresidenti J.D. Vance u shpreh: “Ne nuk kemi plan për të njohur një shtet palestinez. Nuk e di se çfarë do të thoshte të njohësh vërtet një shtet palestinez, ndërkohë që nuk ka një qeveri funksionale”.
Ndërkohë, Franca dhe Mbretëria e Bashkuar janë shprehur se do ta njohin Palestinën si një shtet sovran, duke ndihmuar kështu edhe në tkurrjen e terrorit dhe luftës në Gaza.
Greqi/ Vendi përfshihet nga zjarret
Zjarret e fuqishme në Greqi kanë shkaktuar vdekjen e një personi, ndërsa vendi po përballet me një situatë tejet kaotike. Më tepër se 200 zjarrfikës, 11 avionë dhe 7 helikopterë janë në luftë më zjarret e shumta në Keratea, një zonë në juglindje të Athinës, ndërsa është kryer edhe evakuuimi i banorëve të zonës.
Vatrat e zjarrit po ndihmohen edhe nga erërat e forta, duke vështirësuar kështu punën e zjarrfikësve, por edhe të avionëve që hedhin ujë për t’i shuar zjarret. Banesat e banorëve janë në rrezik të vazhdueshëm dhe gjendja paraqitet e rrezikshme.
