E mbani mend kur ju pyesnin kë do më shumë mamin apo babin? Bëhuni gati për diçka të ngjashme.

Flori Mumajesi ju vë para një zgjedhjeje të vështirë. Ai ka përfunduar dy këngë dhe do të dijë cilën nga ato të publikojë. A thua se s’i publikon dot të dyja. Në Instagramin e tij gjenden pak sekonda nga secila dhe na e merr mendja përmes pëlqimeve, mesazheve e komenteve, ju zgjidhni të preferuarën që do të shohë dritën e diellit.

“E diela është ditë pushimi por ka dhe nga ata që punojnë, si unë në studio,” thotë Flori në një video. “Jam bashkë me bycin tim. Byci po ikën, por dy këngë të reja po vijnë. Në fakt, një nga këngët do të publikoj dhe kjo është arsyeja pse po e bëj këtë video. Janë dy materiale muzikore. Quhen “Thjesht të du” dhe “Mbaroj.” “Thjesht të du” ka bërë xhiro, sepse është kënduar në një dasmë, ka qenë kënga e çiftit dhe të jem i sinqertë edhe unë mezi pres ta këndoj këtë këngë në dasmën time, por le ta ndryshojmë temë. Kemi dhe këngën tjetër, “Mbaroj.” “Mbaroj është këngë shpirtërore, baladë dhe kjo. Mbaroj për ty. Unë do t’i hedh të dyja nga pak në Instagram dhe ju do të vendosni cila do të publikohet.”

“Thjesht të du” është një këngë dashurie e lumtur. Një ndër të rrallat, do të shtonim, sepse çdo këngë dashurie në shqip ka gjithmonë njërin nga faktorët në vijim dhimbje, ndarje, tradhti, largim, kurbet, vjehrrë negative etj. Kjo ama është e lumtur, aq e lumtur sa Flori do ta këndojë në dasmën e vet. Po thotë që kënga është dedikim për dikë? Po thotë që ka ndërmend të martohet? Po thotë që e di me kë do të martohet?

Pyetje me vend të gjitha. Le të kërkojmë nëpër sirtarët e arkivës për përgjigje.

Oh, janë bosh sepse s’ia kemi idenë.

Kënga e dytë, “Mbaroj” ka motive polifonike, iso dhe miratimin tonë. Por nga ana tjetër, duam të dëgjojmë këngën e dasmës së Florit. Të zgjedhësh është e vështirë.

Ose, mund t’i publikojë të dyja se s’e gjen gjë.