Më 17 dhjetor, Redon Makashi festoi 46-vjetorin e tij në një mbledhje intime me familjarët dhe njerëzit e tij më të afërt. I kontaktuar nga ‘Who’, artisti i njohur pranoi se nuk i pret më me entuziazëm ditëlindjet, por i shfrytëzon si një mundësi për ‘të bërë gëzuar’ me familjarët e tij.
Si në çdo përvjetor të ri, që shoqërohet me objektiva dhe projekte të reja për artistët, edhe Redoni ka shprehur dëshirën e tij për vitin e ardhshëm. Ai pret të realizojë një koncert recital me dy kolegët e tij: Aleksandër Gjoka dhe Elton Deda.
“Kemi vite që e projektojmë dhe shpresojmë që këtë vit të bëhet realitet kthimi i ‘3 musketjerëve’ me një koncert recital”, – përfundoi Redoni. Pasi u dëshmua impakti i madh që pati tek publiku interpretimi ‘live’ dhe pa muzikë i Aleksandër Gjokës në ‘Top Show’, s’ka pikën e dyshimit që bashkimi i tre artistëve shqiptarë do të pritet me padurim nga fansat e muzikës së tyre.
