Një grua në Manhattan për pak desh la veten trokë, por fatmirësisht një kamarier bujar i shpëtoi plot 424,000 mijë dollarë.

Bëhet fjalë për shqiptarin Armando Markaj, që ndonëse zonja Karen Vinacour nuk i la as edhe një qindarkë bakshish (për faktin se mes tyre lindi një “zënkë”) vendosi t'i  kthente zarfin që e moshuara harroi mbi tryezën e picerisë.

Ngjarja ndodhi të shtunën e shkuar, ku teksa Markaj po pastronte gjithë ç’kishte mbetur nga dreka e Vinacour- it vuri re një zarf të mbyllur.

“Jam e lumtur për të. Përgjithësisht të shtunat janë shumë të ngarkuara dhe gati sa nuk e mora zarfin dhe ta hidhja në kosh. Thjesht e hapa, pashë që lexonte “Citibank” dhe mendova që ishte diçka e rëndësishme. Kështu vrapova menjëherë jashtë rrugës. por nuk e pashë më [zonjën].” tha i riu për "The News".

Pak sekonda më vonë, pasi e hapi dhe pa zarfin mirë e mirë, Markaj pësoi një shok të vërtetë: brenda tij gjendej një çek i majmë!

Sidoqoftë, i riu, i cili punon në piceri për të siguruar shpenzimet e arsimit të tij vendosi t’ia kthente zarfin pronares. Ç’është e vërteta, mes tij dhe zonjës kishte ndodhur një përplasje pak para se kjo e fundit të largohej dhe bashkë me largimin të harronte dhe zarfin shumëmilionë dollarësh.

Gruas i kishte bërë përshtypje që në piceri kishte shumë më shumë fotografi meshkujsh në raport me të grave dhe nuk kishte nguruar ta pyeste kamarierin Markaj, i cili i ishte përgjigjur se meqë po vjen vera, gratë nuk kanë edhe aq qejf të hanë pica. Kaq ishte dashur dhe Karen kishte vendosur të mos i linte bakshish Armandos, por veçse një shënim.

“Gratë hanë pica, po meqë jemi këtu; a ke dëgjuar që gratë nuk lënë bakshish?”

Ç’ndodhi me zarfin? Iu dha së zonjës dhe ndonëse ajo i ofroi kamarierit një shumë të mirë, ai refuzoi të merrte një shpërblim.