Vdekja e Artur Zhejit: Figura publike reagojnë pas lajmit të papritur

Artur Zheji

Artur Zheji u nda nga jeta në moshën 64-vjeçare, pas një sulmi në zemër, më 23 gusht. Largimi i tij, nga bota e gazetarisë dhe jo vetëm, u cilësua si një “humbje e madhe” dhe shumë figura publike reaguan për lajmin e befasishëm nëpër rrjetet sociale.

Edi Rama

“Lamtumirë mik kohësh të tjera dhe e gjetsh matanë paqen për shpirtin”, u shpreh kryeministri Edi Rama në një postim në rrjetet sociale.

Sali Berisha

Në postimin e tij në rrjetet sociale, Sali Berisha shkroi: “Homazh për Artur Zhejin! Miq, gazeteri, analisti, botuesi, publicisti i mirënjohur Artur Zheji mbylli sot, papritmas dhe para kohe, sytë përgjithmonë. Duke shprehur ngushëllimet e mia më të ndjera familjes, miqve të afërmëve, unë lutem së bashku me ta që shpirti i Arturit të tyre të dashur të gjejë paqen e merituar. Amin!”.

Ilir Meta

“Me pikëllim të madh mora lajmin për ndarjen e parakohshme nga jeta të gazetarit profesionist dhe analistit brilant, Artur Zheji. Një intelektual i angazhuar, veçanërisht në mbrojtje të pavarësisë së medias, vlerave të lirisë dhe parimeve të shtetit të së drejtës, Zheji udhëhoqi edhe si bashkëkryetar Komitetin për Mbrojtjen e Kushtetutës, duke dhënë një kontribut të paharruar politik e shoqëror që përherë do të vlerësohet me respekt”, shkroi në mbishkrimin e postimit të tij Ilir Meta, duke shtuar: “Është trishtim i madh kur një mik dhe një profesionist si ai humbet jetën në mënyrë kaq të papritur dhe në kulmin e pjekurisë jetësore dhe profesionale. Një humbje e madhe dhe e pazëvendësueshme, jo vetëm për familjen e tij, por edhe për komunitetin e gazetarëve, me të cilët ndaj ngushëllimet e mia më të sinqerta! I paharruar kujtimi i tij! Të prehet në paqen e merituar!”.

Erion Veliaj

“Lajm fort i hidhur ndarja nga jeta e Artur Zhejit! Ngushëllime familjes, të afermve, miqve e kolegëve për humbjen e rëndë të gazetarit dhe publicistit të shquar, që i dha shumë medias shqiptare nga vitet ‘90 e deri sot. Arturi ishte një intelektual i spikatur, një mendje kritike dhe një gazetar kalibri që do t’i mungojë shumë publikut. Prehu në paqe mik i mirë!”, shkroi kryetari i bashkisë së Tiranës.

Albin Kurti, në një mesazh të gjatë në Facebook, shprehu gjithashtu ngushëllimet e tij:

Rudina Xhunga

Gazetarja publikoi lajmin e hidhur në Instastory, ku shkroi:

Ardit Gjebrea

Ardit Gjebra, mik i vjetër i gazetarit të ndjerë, përmes një postimi në Instagram, tregoi se kur Arturi të kthehej nga pushimet, ata do të takoheshin:

“Po pse mo Tur...?! Lajmi më i trishtë dhe i paimagjinuar që mund të merrja sot! Miku i mirë me të cilin ndaja orë bisedash me vlerë, gazetari që i dha peshë televizioneve ku punoi, mendimtari këshillues për shumë momente të vështira miqsh, skaneristi politik ekselent... nuk do e kemi më. Një peng mbetet - kafja jonë e lënë këto ditë, pas kthimit nga pushimet... por do ketë një moment tjetër, me siguri do e rikuperojmë. Pra, nuk ka lamtumirë, thjesht mirupafshim!”.

Blendi Fevziu

Blendi publikoi një foto ku shfaqej ai dhe Arturi, në studion e “Opinon” dhe shkroi: “Artur Zheji u nda nga kjo botë sot krejt papritur. Në moshë ende të re dhe në kulm të energjive dhe të angazhimit publik. Bashkë me të, iku edhe një zë i rëndësishëm dhe autoritar i mediave e mbi të gjitha, një intelektual dhe qytetar par excellence. Duke e njohur prej viteve ‘80 dhe duke bashkëpunuar për thuaj 25 vjet me të, mbeta tejet i trishtuar nga ky lajm tragjik. U prehsh në paqe, Tur!”.

Homazhet për gazetarin dhe publicistin e ndjerë do të mbahen ditën e 25 gushtit, nga ora 10:00-14:00 në ambientet e Akademisë së Arteve.

Ai u nda nga jeta në mënyrë të papritur, teksa ishte duke drekuar me të shoqen dhe djalin në një restorant në Sarandë.