Të kërkosh falje nuk është e lehtë. Qoftë sepse nuk je mësuar ta bësh, nuk di si ta formulosh apo ke vështirësi të pranosh përgjegjësinë, fakti që ke gabuar nuk është ndjesia më e këndshme. Për më tepër, nëse të tremb ideja e të pranuarit gabimet përpara të tjerëve, kjo e bën faljen edhe më të vështirë.
Por ja ku është e vërteta: të kërkosh falje është një aftësi që ndihmon marrëdhëniet të jenë më të shëndetshme. Me kohën, do kuptosh se është në rregull të gabosh dhe ta pranosh këtë. Madje, një falje e sinqertë mund të krijojë lidhje edhe më të forta me njerëzit e rëndësishëm për ty. Dhe kjo tingëllon si diçka e mirë, apo jo?
Për më tepër, nuk ka nevojë të kërkosh falje në mënyrë të përsosur. Ajo që ka rëndësi është të tregosh që je gati të marrësh përgjegjësinë dhe të riparosh marrëdhënien. Nëse nuk e di nga t’ia nisësh, ja disa këshilla që mund të të ndihmojnë:
Mendo për qëllimin e faljes
Nëse synimi yt është thjesht të mbyllësh këtë kapitull sa më shpejt, po e bën gabim. Falja duhet të vijë si një pranim i sinqertë i gabimit dhe një tregues që të intereson personi që ke lënduar.
Qetësohu para se të flasësh
Nëse ideja e kërkimit të faljes të streson, është normale. Kjo nuk do të thotë që duhet ta shmangësh, por të marrësh disa sekonda për t’u qetësuar nuk është keq. Nëse ndjen se zemra po të rreh shpejt ose duart të janë djersitur, përpiqu të përqendrohesh dhe të marrësh frymë thellë. Mund t’i thuash vetes: “Edhe pse kjo ndjesi është e sikletshme, do ndihem mirë që po bëj gjënë e duhur.”
Mos u justifiko
Nëse do të kërkosh falje me gjithë shpirt, hiq dorë nga justifikimet. Një falje që fillon me “Më fal, por…” nuk është një falje e vërtetë.
Nëse pas faljes shton fraza si “Por ti e dije që do më mërziste kjo” ose “Por kam qenë shumë i/e stresuar kohët e fundit”, nuk po merr vërtet përgjegjësi për atë që ke bërë. Një falje duhet të jetë e pastër dhe pa kushte.
Jep hapësirë për ndjenjat e tjetrit
Pasi ke kërkuar falje dhe ke menduar si ta rregullosh situatën, është koha të dëgjosh edhe personin tjetër. Kjo është një nga pjesët më të rëndësishme të një faljeje të sinqertë.
Mund ta nisësh me pyetje si “Çfarë mendon për këtë?” ose “A ka diçka tjetër që do të doje të ndaje?” dhe më pas, dëgjo pa e ndërprerë dhe pa u mbrojtur. Nuk është gjithmonë e lehtë, por të tregosh se di të pranosh kritika kur gabon mund ta bëjë marrëdhënien edhe më të fortë me kalimin e kohës.
Në fund të fundit, të kërkosh falje nuk është thjesht për të thënë “Më fal”, por për të treguar që ke reflektuar dhe je gati të bësh më mirë.
