Ndryshimet te thonjtë nuk janë vetëm çështje estetike. Shpesh, ato pasqyrojnë gjendjen e përgjithshme të trupit, nga mungesat ushqyese te faktorë si stresi, lagështia e tepërt apo dëmtimet e vogla të përditshme.
Sipas mjekëve, në shumicën e rasteve, thonjtë e dobët, të brishtë apo që çahen lidhen më shumë me ushqimin dhe stilin e jetesës sesa me sëmundje serioze. Megjithatë, disa shenja nuk duhen injoruar.
Ndryshime në strukturë
1. Thonj të brishtë dhe që çahen lehtë
Shkaktohen zakonisht nga lagia dhe tharja e shpeshtë e duarve. Në disa raste, mund të lidhen edhe me mungesë hekuri ose probleme me tiroiden.
Çfarë ndihmon: kremra ushqyes, vajra për thonjtë dhe doreza gjatë punëve me ujë.
2. Thonj të butë
Thonjtë që thyhen ose përkulen lehtë shpesh lidhen me kontakt të shpeshtë të tyre me kimikate apo mungesë të vitaminave B, kalciumit dhe yndyrnave të shëndetshme.
Çfarë ndihmon: shmang manikyret e shpeshta dhe konsumo ushqim më të pasur me vitamina.
3. Thonj që çahen "peta-peta"
Shkaku mund të jetë dëmtim mekanik (përdorimi i thonjve si “vegël”) ose mungesë hekuri.
Këshillë: nëse ndodh edhe me thonjtë e këmbëve, kontrollo nivelin e hekurit.
4. Vija në thonj
Vija vertikale: zakonisht lidhen me moshën dhe nuk janë shqetësuese.
Vija horizontale: mund të tregojnë një problem shëndetësor që kërkon kontroll mjekësor.
Ndryshime në ngjyrë
5. Thonj të verdhë
Shpesh shkaktohen nga infeksione ose nga përdorimi i shpeshtë i manikyrit. Rrallëherë lidhen me probleme më serioze.
Zgjidhje: lëre thoin të rritet natyrshëm dhe shmang manikyret për një kohë.
6. Vija të errëta ose të zeza
Zakonisht vijnë nga goditje. Nëse nuk largohen me kalimin e kohës ose shoqërohen me simptoma të tjera, kërko këshillë mjekësore.
7. Njolla të bardha
Mund të lidhen me mungesë zinku, alergji, infeksione ose dëmtime të vogla të thoit.
Këshillë: shmang produktet agresive dhe jepi kohë thoit të rinovohet.
8. Mungesa e gjysmëhënës së bardhë në bazën e thoit
Në shumicën e rasteve është normale. Por nëse zhduket papritur, mund të lidhet me lodhje, anemi ose ushqyerje jo të mjaftueshme.
Kur duhet të shkosh te mjeku?
Nëse ndryshimet te thonjtë shoqërohen me:
-lodhje të vazhdueshme;
-rënie në peshë;
-marramendje;
-djersitje natën;
-rrahje të shpejta zemre;
-vija horizontale të theksuara;
është e rëndësishme të bësh një kontroll mjekësor.
Si t’i mbash thonjtë të shëndetshëm
-Ushqehu me fruta, perime dhe drithëra të plota
-Hidratohu mirë
-Jepu thonjve pushim nga manikyri
-Përdor vajra dhe kremra ushqyes
-Kujdes me suplementet, mos i merr pa nevojë
