Blendi Fezviu ishte i ftuar te “Rudina” dy ditë më parë për të folur mbi një nga pasionet e tij – udhëtimet. Mund të ishte ftuar kushdo tjetër, por nisur nga fakti se Fevziu udhëton në vende jo fort të njohura, por me histori të veçantë, ishte ai i përzgjedhuri për emisionin e pasdites. Megjithatë duket se intervista u shndërrua në objekt debati në internet.

“E dashur zonja Magjistari, nuk besoj se i intereson popullit shqiptar se si i kaloi Blendi Fevziu pushimet. Këto mund t’i diskutoni në kafene. Mendoj se populli ynë ka nevojë për mbështetje sociale, ekonomike, psikologjike dhe vetëm me këto emisione nuk mund t’i ndihmoni dot, por po i ngatërroni më shumë,” shkruan një ndjekëse, të cilës Rudina iu përgjigj kështu:

“Zonjë, mbështetje social-ekonomike duhet të kërkoni në institucionet shtetërore, atë psikologjike tek ekspertët e shëndetit mendor. Televizioni ka për detyrë të informojë, argëtojë dhe edukojë, detyra të cilat përpiqemi t’i bëjmë çdo ditë me shumë përkushtim. Madje edhe kur kemi patur mundësi të ndihmojmë, e kemi bërë jo rrallë. Faleminderit që na ndiqni!”

Disa komentues kërkojë që emisioni i pasdites në Tv Klan “të bëj diçka për ekonominë e shtetit” ose “të marrë në intervista njerëz të thjeshtë dhe t’i pyesë nëse patën mundësi të bëjnë udhëtime”. Sigurisht që me këto ide nuk kanë rënë dakord një pjesë e mirë e njerëzve, që ndër të tjera theksojnë se qëllimi i emisionit është të argëtojë dhe trajtojë tema sociale si edhe të realizojë intervista përgjithësisht me të ftuar të njohur.

“Sa herë e fton Fevziun për udhëtimet, e dëgjoj me shumë ëndje. Ai tregon bukur dhe me detaje. Ndoshta vetë nuk do të kemi mundësinë t’i vizitojmë këto vende nga afër!” shton dikush.

“Sa mirë bëri që na informoi për shtete që nuk kemi mundësinë t’i shohim. Unë u kënaqa sepse ishin vende të mrekullueshme, për të cilat kujtojmë se janë vende të varfëra,” lexohet në një tjetër koment.

Artikull i rekomanduar: Blendi, të lutem më merr dhe mua në valixhen tënde!