Serxhio Martiniani, djali i mbijetuar nga aksidenti tragjik i dy viteve më parë ku humbi jetën Atjon Zhiti, djali i shkrimtarit Visar Zhiti, ishte i ftuari i sotëm në emisionin “Rudina” në televizionin “Klan”. Për herë të parë, Serxhio rrëfeu publikisht çfarë ndodhi natën e 20 dhjetorit të vitit 2014, kur ndodhi aksidenti që i mori jetën shokut të tij dhe e la atë të paralizuar në një karrocë me rrota.
“As unë as Atjoni nuk kishim futur asnjë pikë alkool në gojë. Ne jemi nis rreth orës 4 – 5, errësirë totale, Ationi kishte qejf dritën e diellit, orar i energjishëm Që nga momenti i përplasjes, deri në çastin që u zgjova nga koma, nuk mbaj më mend asgjë.”- u shpreh Serxhio, i cili qëndroi në koma për 3 muaj. Ai rrëfeu se lajmin e vdekjes së Ationit, e ka marrë nga babai i tij, teksa ndodhej në spital në Gjermani, ende pa mësuar se vetë ishte paralizuar nga këmbët.
“Thirra doktorin e repartit për ta pyetur për disa gjëra. I thashë të çohem… por gjermanët, siç janë të sertë, doktori m’u përgjigj: ‘Ti do jesh në karrocë me rrota për të paktën 10 vjet.’ Megjithatë nuk kam si të qahem, kur mora vesh që Atjoni kishte vdekur.”-u shpreh Serxhio, duke shpjeguar më tej se që prej kthimit në Shqipëri, është munduar të jetë i pavarur dhe që shumë gjëra t’i bëjë vetë, pa ndihmën e prindërve.
“Operacionet më të forta i kam kaluar në gjendje kome. Mami më ka qëndruar pranë gjatë gjithë kohës, nuk jepnin shpresë që unë do të jetoja. Nga 15 operacione, 10 kam bërë në koma, i pavetëdijshëm. Kur jam çuar, kam bërë pjesën tjetër. Sapo hipa në karrocë nuk qëndroja dot dhe qaja. Kam qenë 40 kilogramë e pak.”- u shpreh ai duke falenderuar më tej të gjithë personat që kishin kontribuuar për kurimin e tij.
Ndërsa përsa i përket procesit gjhyqësor në të cilin ai akuzohet për tejkalim të normave të shpejtësisë, Martiniani shprehet se do të provojë se është i pafajshëm. Sipas tij, nuk ka qenë aspak shpejtësia ajo që shkaktoi aksidentin por mungesa e sinjalistikës në një zonë të rrugës Tiranë-Durrës, pranë një kantieri ndërtimi.
Burimi: Klan
