E fillojmë me titujt e Alban Skënderajt, që në fakt janë aq karakteristikë sa meritojnë një artikull më vete. Titujt e tij janë për dashurinë, për atë, për ata të dy, për zemrën, për ndarjen. Për shembull ai zgjohet në mëngjes dhe i thotë “Mirëmëngjes” o “Mrekullia e tetë”. Pastaj rri edhe e vështron sepse ajo është një “Engjëll” që e ka goditur “Drejt në zemër”.
Pasi i ka thënë “Mirë se vjen në shpirtin tim”, ai i thotë “Nuk je vetëm” dhe “Duamë” çdo ditë “24 orë”. “Unë dhe Ti” (pra ai dhe ajo) janë si “Hapësira e një ëndrre”.
Sigurisht që në titujt e Albanit ka edhe ndarje, që rrëfehen te “Stoli i trëndafilave”, ku ai “Refuzon” të harrojë “Ata sy” dhe vetëm shpreson duke thënë “Më prit atje”.
Kalojmë te Dafina Zeqiri. Dafina duket se nuk mjaftohet me një, por preferon të përsërisë fjalët si “Ring Ring”, “Lule Lule” dhe “Bye Bye”.
Ndërsa Flori Mumajesi ka një dobësi për foljet dhe vihet re që i përdor në shumë tituj: “Plas”, “Mori”, “Ja ke bo vetes”, “Ta dish ti ç’pësoj kjo zemër”, “S’ta fal”, “Ku isha unë”. Këngët e fundit titullohen “Të du” dhe “Mbaroj”.
Ledri është i dhënë më së shumti pas titujve të gjatë, por të shkurtuar, si “TTZ” (Tona t’zeza), “SRMN” (Sun rri me neve), “MEM” (Më e mira).
Noizy ka çdo titull të mundshëm që nënkupton se atmosfera është ndezur si “30 vet”, “Kallabllak”, “Nuk kan besu”, “Toto”. Ah, kemi edhe benzin: “Big Body Benzo” dhe “New Benz”.
Tayna duket sikur është zhytur në një botë latine me “Columbiana", “Caliente”, “Sicko” e “Pow Pow”.
