Tani është momenti që "dashamirësit" e yjeve të nxjerrin karriget dhe të përgatiten për një nga shfaqjet më mahnitëse të shiut të meteorëve gjatë vitit.
Shiu i meteorëve të njohur si Perseidet pritet të arrijë kulmin natën e sotme të 12 gushtit, megjithëse aktiviteti i tyre ka nisur që prej mesit të korrikut dhe do të vazhdojë të shihet edhe për disa javë të tjera.
Ky fenomen vjetor, më i dukshëm në hemisferën veriore, ndodh kur mbeturinat e një komete të lashtë digjen në atmosferën e Tokës.
“Çdo vit, Toka kalon nëpër mbeturinat që lë pas trupi qiellor i lashtë, Kometa 109P/Swift-Tuttle, e cila besohet të jetë më e vjetër se vetë Toka, mbi 5 miliardë vjet,” shpjegon Dr. Richard Parker, astrofizikan në Universitetin e Sheffield-it.
Ai tregon se kjo kometë viziton sistemin diellor të brendshëm çdo 133 vjet dhe pritet të jetë afër Tokës sërish në vitin 2126.
“E veçanta e kësaj komete është që ajo është objekti më i madh që afrohet pranë Tokës, por fatmirësisht nuk pritet të vijë shumë pranë për mijëra vjet,” shton ai.
Perseidet shkaktohen pikërisht nga mbeturinat që kometa ka lënë pas në hapësirë.
“Nga Toka, duket sikur meteorët vijnë nga e njëjta pjesë e qiellit çdo vit, nga konstelacioni i Perseut, ndaj dhe kanë këtë emër,” shpjegon Dr. Ed Bloomer, astronom në Observatorin Mbretëror në Greenwich.
Për të pasur shanset më të mira për të parë shiun e meteorëve, ai rekomandon të ktheni shikimin pak nga lindja-juglindja, drejt planetit Saturn, ose më shumë në veri, drejt yllësisë Ursa Major.
“Shikoni pak anash nga Perseidet, nëpër skajin e syrit tuaj, sepse meteorët shpesh shfaqen në periferi dhe janë më të dukshëm në dritë të ulët,” thotë ai.
Megjithatë, pasi kulmi i shiut të meteorëve bie pak ditë pas hënës së plotë, meteorët më të dobët mund të jenë të vështirë për t’u dalluar këtë vit.
Ekspertët rekomandojnë të shkoni në vende sa më të errëta, të prisni deri në 30 minuta për të bërë adaptimin e syve dhe të qëndroni me durim, pasi meteorët shfaqen vetëm për disa sekonda.
“Nuk është diçka që mund t’ia tregosh dikujt dhe ta shikojë saktësisht në të njëjtën kohë. Është një përvojë më shumë personale dhe e qetë, ku thjesht duhet të jesh i pranishëm dhe të shikosh qiellin,” përfundon Bloomer.
Orët më të mira për t’i parë janë nga ora 23:00 deri në rreth 4:00 të mëngjesit, kur qielli është më i errët dhe yjet duken më qartë. Në Europë, vendet si Britania e Madhe, Gjermania, Franca, dhe Skandinavia janë ndër më të favorshmet për ta parë sot këtë fenomen natyror.
Në Shqipëri, vendet më të mira për të parë shiun e meteorëve Perseide janë ato me sa më pak ndriçim urban, ku qielli duket më i pastër. Të tilla mund të jenë Parku Kombëtar i Lurës, Gjiri i Lalzit, rrethinat e Beratit apo Gjirokastrës, zona pranë Liqenit të Shkodrës, në një pikë me pak dritë artificiale.
Nëse je në ndonjë nga këto vende, veçanërisht në mesnatë dhe deri në mëngjesin e hershëm të 13 gushtit, do të kesh shans shumë të mirë ta shohësh këtë spektakël magjik natyror.
Burimi: The Guardian
