Gerta Gixhari, e ftuar në “Ftesë në 5”, ka folur për përvojën në “BBVA 4”, bullizmin ndaj Gjestit dhe momentin kur ajo i hodhi shampanjë në sy ish-konkurrentit dhe fituesit të edicionit të katërt.
Ajo e cilësoi përvojën në këtë reality show si “të paharrueshme” dhe u ndal te bullizmi që sipas saj, të gjithë banorët i kanë bërë atij. Gerta theksoi se kjo situatë i dukej shumë e rëndë, duke qenë se është vetë nënë.
“Gjestin të gjithë e kanë bullizuar në shtëpi dhe mua më dukej shumë e rëndë, duke qenë se jam nënë. Tani bullizimi në shkolla është shumë i lartë dhe fëmijët hasin një problem shumë të madh. Historitë bullizuese unë i kam dëgjuar edhe jashtë asaj shtëpie. Nëse ka pasur pika që mua më kanë prekur shumë kanë qenë bullizimet. Në momentin që ai është bullizuar mua më ka ardhur për së brendshmi për ta mbrojtur”, u shpreh Gerta.
Ajo dha mendimin e saj edhe për lojën e Gjestit brenda në shtëpi, duke u ndalur edhe te fakti që i hodhi pije alkoolike në sy. Kjo më tej, çoi skualifikimin e Gertës me Zarf të Zi. Gerta u rikthye në lojë pasi publiku, përmes televotimit, vendosi që ajo të vazhdonte lojën.
“Nga ana tjetër e gjithë situata me Gjestin është marrë më shumë seriozisht nga banorët e tjerë, duke hyrë në këto grackat e vogla dhe provokimet e vogla që bënte. Unë i konsideroja si lojëra fëmijësh, ndërsa banorët i morën shumë seriozisht. Ata nuk kishin mundësi që t’ia kthenin. Unë do preferoja që të qëndronim te lojërat e Gjestit dhe jo te serioziteti i tij si lojtar. Dhe kjo ishte e bukura te Gjesti, lojërat. Për çështjen e shampanjës, ishte jo që unë të bija në provokimin e Gjesti, por duke qenë se ai luante në këtë mënyrë, edhe unë luajta. Unë doja ta ktheja në lojë, nuk u nisa për ta lënduar”, tha ajo.
Gerta ishte një ndër konkurrentet më të diskutuara të këtij edicioni në “BBVA 4”. Ajo u eliminua pak para finales, duke humbur përballë Eglit, e cila u shpall finaliste.
