Fedez ka zgjedhur të flasë për një nga periudhat më të vështira të jetës së tij: divorcin nga Chiara Ferragni. Por mbi të gjitha, artisti italian u ndal te marrëdhënia e tij me dy fëmijët, Leone dhe Vittoria. Ai rrëfeu jetën pas divorcit dhe se si kjo periudhë ka ndikuar në rapot me ta.
Kjo rrëfim i gjatë emocional erdhi gjatë një videoje që Fedez realizoi me youtuber-in italian Gabriele Vagnato. Ata kaluan 24 orë bashkë, për një përmbajtje që u bë virale dhe arriti miliona klikime brenda pak kohësh.
Fedez pranoi se pjesa më e vështirë pas ndarjes ka qenë largësia nga fëmijët.
“Kam ditë të caktuara kur i takoj, por si çdo gjë në jetë, njeriu mësohet. Edhe unë, edhe fëmijët. Jam me fat që ndaj kohën me ta në mënyrë të barabartë me nënën e tyre. Ka shumë baballarë që nuk e kanë këtë mundësi.”
Ndryshe nga shumë personazhe të famshëm, ai ka zgjedhur të mos punësojë një dado.
“Vendimi i vetëm që mora ishte të mos kisha dado. Më ndihmon babai im,” rrëfeu Fedez. “Që do të thotë se në moshën 35-vjeçare, ke sërish babanë gjithmonë në shtëpi që kujdeset për ty.”
Një nga momentet më të vështira, tha Fedez, ishte kur ai dhe Chiara vendosën t'u shpjegonin fëmijëve se do të ndaheshin. “Fëmijët na pyetën pse morëm këtë vendim. Zemra të thyhet, nuk është aspak e lehtë. Por janë gjëra që duhet t’I bësh. U shpjeguam gjithçka dhe u thamë se edhe kur prindërit ndahen, familja mbetet gjithmonë.”
Në bisedën me Gabriele Vagnato, po ashtu ai foli hapur për jetën që kishte me Chiara Ferragni, një jetë që, sipas tij, nuk ishte e vërteta e tij.
“Kam neveri për jetën që kisha më parë.
Gjithçka bazohej te perceptimi i të tjerëve për mua. Nuk dua më të luaj rolin e njeriut perfekt, që kam luajtur për vite.”
Nga jashtë, jeta e tyre dukej perfekte: një vilë luksoze, dy fëmijë të bukur, udhëtime përrallore. Por sipas Fedez, pas atij imazhi fshihej një realitet që nuk e përfaqësonte.
“E shkatërrova gjithçka që kisha ndërtuar. Por kjo ka edhe bukurinë e vet, sepse nga rrënojat mund të ndërtohen gjëra të reja, më të mira.”
Ai komentoi edhe thashethemet që kanë qarkulluar për jetën e tij të re romantike. Ndërsa Chiara Ferragni është lidhur me biznesmenin Alessandro Tronchetti Provera, emri i Fedez-it është lidhur me disa vajza, por sipas tij, shumica janë thjesht trillime.
“Kur dalin lajmet për mua, nuk më bëjnë më asgjë. Por kur frekuentoj persona që nuk janë mësuar me këtë lloj vëmendjeje, e shoh sa shumë i dëmton. Me Claran nuk ndodhi asgjë. Nuk jemi bashkë,” tregoi ai.
Fedez dhe Chiara Ferragni u ndanë në fillim të vitit 2024, pas një periudhe të vështirë në çift.
