Facebook njohtoi së fundmi shërbimin më të ri të platformës, që për momentin është aktiv vetëm në Amerikë. Facebook Dating lejon çdo përdorues mbi 18 vjeç që të krijojë një profil për njohje – dhe po, halla në Greqi nuk do t’ju shohë – lidhur me llogarinë kryesore në Facebook.
Hapësira e re e njohjeve është një opsion që do të bashkëngjitet në të njëjtin vend me Events, Groups, Marketplace etj. Facebook Dating funksionon si të gjithë aplikacionet e tjerë të njohjeve, në të cilën ju vendosni të dhënat dhe interesat tuaja. Në vijim, algoritmi do t’ju sugjerojë njerëz bazuar në preferencat tuaja personale, vendodhjen, miqtë e përbashkët etj.
“Vetëm emri dhe mosha do të kalojnë automatikisht nga profili juaj në Facebook,” u shpreh shefi i privatësisë së Facebook, Erin Egan. “Të gjitha informacionet e tjera si identiteti gjinor dhe seksual, interesat, foto etj do të vendosen nga ju.” Përdorimi është i thjeshtë dhe i njëjtë me të gjithë aplikacionet e ngjashme; nëse ju pëlqen dikush, mund t’i shkruani ose bëni like ose në të kundërt mund të klikoni “X”.
Facebook Dating ju lejon që të njiheni me “friends of friends” dhe jo me miqtë tuaj në Facebook. Po kështu, nëse keni një fiksim sekret, mund ta shtoni në listën Secret Crush. Pak a shumë si në kohën e gjimnazit kur shkruanit emrin e tij/e saj diku mes shënimeve dhe e fshinit më pas. Nëse fati do që edhe ai/ajo t’ju shtojë në Secret Crush, Facebook do të bëjë ndërmjetësin duke ju njoftuar të dyve. Pjesa tjetër pastaj mund të jetë një histori e këndshme dashurie.
Sigurisht që nuk kanë munguar as pikëpyetjet në lidhje me sigurinë e këtij shërbimi të ri, pasi Facebook prej kohësh është kritikuar në lidhje me mosrespektimin e privatësisë.
Burimi: The Guardian
