Një nga momentet më domethënëse në historinë e modës po mbahet këtë vit në Paris: çanta e parë autentike Hermès Birkin, e krijuar për vetë Jane Birkin, do të dalë për herë të parë në ankand nga Sotheby’s.
Siç u njoftua të enjten nga shtëpia prestigjioze e ankandeve, çanta do të jetë në qendër të koleksionit "Ikonat e Modës", i cili do të mbahet më 10 korrik.
Bëhet fjalë për një Birkin prej lëkure të zezë, të qepur me dorë, që u krijua posaçërisht për këngëtaren dhe aktoren Jane Birkin, e cila u nda nga jeta në vitin 2023.
Historia e kësaj çante legjendare nisi rreth 40 vite më parë, gjatë një fluturimi ku Jane Birkin rastësisht u ul pranë Jean-Louis Dumas, atëherë drejtor ekzekutiv i Hermès. Biseda e tyre rreth mungesës së një çante që të ishte njëkohësisht elegante dhe funksionale u bë shkëndija që çoi në lindjen e një prej aksesorëve më të famshëm të të gjitha kohërave.
“Ka raste kur një objekt e tejkalon funksionin e tij dhe shndërrohet në një simbol kulturor. Çanta origjinale e Jane Birkin është një nga ato raste të rralla,” u shpreh Morgane Halimi, drejtore e departamentit të çantave dhe modës në Sotheby’s.
Halimi e krahasoi këtë Birkin me objekte të tjera të njohura me vlerë historike, si pulovra me ‘dele të zeza’ e Princeshës Diana apo kurora e Freddie Mercury-t.
“Ashtu si ato, edhe Birkin origjinal ka potencialin të ndryshojë rregullat e ankandeve të modës,” shtoi ajo.
Edhe pse çmimi i parashikuar nuk është bërë publik, statusi historik i çantës dhe lidhja e saj me një ikonë si Jane Birkin pritet të tërheqë interes të jashtëzakonshëm nga koleksionistë dhe shtëpi mode në mbarë botën.
Artikuj të sugjeruar:
