Maria Grazia Chiuri largohet nga Dior, pas 9 vitesh ku pati rolin e drejtoreshës kreative të koleksioneve të haute couture dhe aksesorëve për gra në shtëpinë e modës Dior.
“Christian Dior Couture njofton se Maria Grazia Chiuri ka vendosur të largohet nga pozicioni i saj si drejtoreshë kreative e koleksioneve për gra në haute couture dhe aksesorë,” thuhej në një deklaratë të bërë publike nga shtëpia franceze e modës.
“Shpreh mirënjohjen time më të thellë për Maria Grazia Chiuri, e cila, që nga ardhja e saj në Dior, ka bërë një punë të jashtëzakonshme me një perspektivë feministe frymëzuese dhe kreativitet të jashtëzakonshëm; të gjitha të përshkruara nga shpirti i Monsieur Dior, që i mundësoi asaj të krijojë koleksione të arrira,” tha Delphine Arnault, kryetare dhe drejtoreshë ekzekutive e Christian Dior Couture.
“Ajo ka shkruar një kapitull kyç në historinë e Christian Dior, duke kontribuar ndjeshëm në rritjen e jashtëzakonshme të tij dhe duke qenë gruaja e parë që udhëhoqi krijimin e koleksioneve për gra", vijoi ajo.
Chiuri, gjithashtu shprehu falenderimet e saj:
“Dua të falënderoj Z. Arnault (Bernard Arnault, CEO i LVMH) për besimin që më dha dhe Delphine për mbështetjen e saj. Jam veçanërisht mirënjohëse për punën e realizuar nga ekipet dhe atelietë e mia. Talenti dhe ekspertiza e tyre më lejuan të vë në jetë vizionin tim mbi modën për gratë. Së bashku kemi shkruar një kapitull me ndikim për të cilin jam jashtëzakonisht krenare.”
Pasardhësi i saj ende nuk është shpallur.
Stilistja italiane Maria Grazia Chiuri e nisi karrierën e saj në Fendi në vitin 1989 si dizajnere çantash dhe më pas kaloi te Valentino në vitin 1999 si dizajnere aksesorësh, për t’u promovuar në bashkëdrejtoreshë kreative përkrah Pierpaolo Piccioli në vitin 2008.
Ajo u emërua në Dior në vitin 2016, duke u bërë dizajnerja e parë grua që nga themelimi i shtëpisë në vitin 1947 — pasardhëse e Christian Dior, Yves Saint Laurent, Marc Bohan, Gianfranco Ferré, John Galliano dhe Raf Simons.
Koleksioni i saj debutues për pranverë-verë 2017, përfshinte bluza me slogane si “We should all be feminists” ("Të gjithë duhet të jemi feministë"). Kjo e përcaktoi tonin e drejtimit të saj, i cili shpesh i referohej fuqizimit të grave.
Gjatë viteve, Chiuri bashkëpunoi me disa artiste për skenografitë e sfilatave, përfshirë Judy Chicago, Faith Ringgold, Eva Jospin dhe Mickalene Thomas. Ajo pati një qasje tejet interesante dhe kujtojmë se në sfilatën Dior SS25, artistja dhe sportistja italiane Sagg Napoli gjuajti me shigjeta ndërsa sfilonte.
Artikuj të sugjeruar:
