Britney Spears ka shitur katalogun e saj muzikor. Sipas raportimeve të Page Six, këngëtarja ka nënshkruar një marrëveshje me një shumë të konsiderueshme, duke hequr dorë nga të drejtat e saj mbi këngët e këtij katalogu.
Sipas disa dokumenteve të siguruara nga TMZ, Britney Spears ia ka shitur katalogun e saj kompanisë private "Primary Wave", me qendër në New York, më 30 dhjetor. Një burim tha për TMZ se kjo “marrëveshje historike” mund të jetë në të njëjtën vlerë me shumën që Justin Bieber mori kur shiti katalogun e tij në vitin 2022. Bëhet fjalë për rreth 200 milionë dollarë.
Kjo shitje përfshiu hitet më të mëdha të Britney Spears, përfshirë këngët nga albumi i vitit 1999, “…Baby One More Time”, albumin “In The Zone,” që përfshinte këngën e vitit 2003 “Toxic,” si edhe shumë këngë të tjera të publikuara në fund të viteve '90 dhe fillimit të viteve 2000, si “(You Drive Me) Crazy,” “…Baby One More Time,” “Oops!… I Did It Again,” “Everytime,” “Piece of Me,” “Hold It Against Me” dhe “Gimme More.”
Edhe pse ende nuk ka një reagim zyrtar nga përfaqësuesit e këngëtares, burimet kanë treguar se Britney Spears është e lumtur dhe po feston me dy djemtë e saj, Jayden dhe Sean.
Kjo nuk është hera e parë që këngëtarë të famshëm vendosin të shesin katalogun e tyre muzikor. Justin Bieber, Shakira, Stevie Nicks, Bob Dylan e të tjerë gjithashtu kanë hequr dorë nga të drejtat nga këngët e tyre në këmbim të shumave të mëdha.
Edhe pse Britney Spears duket se është shkëputur nga muzika, ajo po ndihmon djalin e saj, Jayden, me karrierën e tij muzikore.
“Britney po e ndihmon të kontaktojë me disa producentë me të cilët ka punuar më parë. Ajo dëshiron që ai të përdorë njohjet e saj të vjetra që të jetë i mbrojtur dhe udhëhequr siç duhet.”
