Saranda Hoda, e njohur si Sasa, banore e "Big Brother VIP Kosova 4", ka folur në rrëfimin e jetës së saj për sëmundjen e rrallë nga e cila vuan. Me vetëm 16 persona në të gjithë botën që ndajnë të njëjtën diagnozë, Sasa tregoi vështirësitë e të jetuarit me tumor në enët e gjakut.
"Kur kam qenë 8 vjeç dhe kam shkuar për herë të parë në Itali, kam kuptuar që nuk mund të jem njësoj si vajzat e tjera, do kem një defekt në trup, por me shpresën se do të shërohem shpejt, ama zgjati me vite. Adoleshenca ime ka qenë e tmerrshme, sëmundja shkoi në atë fazë që më çoi gati drejt vdekjes," nisi Sasa të rrëfente.
Moderatorja shpjegoi më tej se risqet për t'iu nënshtruar një operacioni ishin tejet të larta dhe ishte e vështirë të gjeje mjekë që do ta merrnin përsipër një ndërhyrje të tillë.
"Mbaj mend shumë mirë kur mjeku erdhi dhe më tha që nuk mund të të operojmë, sepse 90% e ke kokën në rrezik. I kam thënë babit 'mos më lër të vdes të lutem'."
Megjithatë, Sasa e kreu operacionin në zonën e barkut me sukses dhe është vazhdimisht nën kujdesin e mjekëve, duke kryer analiza mujore. Pjesa më e dhimbshme e gjithë sëmundjes për të, është pamundësia për t'u bërë nënë:
"Plagën e kam pasur një vit në trup të hapur, me gjakderdhje kohë pas kohe. Jetoj me përkujdesje të mjekëve. Kjo sëmundje ma ka bërë të pamundur ndjenjën më të bukur në botë, të qenit nënë. Më preku shumë sepse fëmijët janë gjëja që dua më së shumti në botë."
Sasa vuan nga sëmundja e quajtur hemangioma, për të cilën ka folur edhe më parë në televizion, që ka të bëjë me rritjen e pakontrolluar të enëve të gjakut. Ajo është personi i parë që i është nënshtruar operacionit për sëmundjen e saj dhe që mrekullisht arriti t'i mbijetojë, pavarësisht shpresave të ulëta nga mjekët.
