Ashtu si Albano Bogdon dhe Channing Tatum – të cilët treguan se do të largohen së shpejti nga rrjetet sociale – edhe Vesa Lumën e përfshiu presioni i të qenurit një personazh publik. Në një postim në Instagram, këngëtarja rrëfen se ndryshimi i stilit të jetesës si edhe dëshira për të mos përsëritur veten në projektet e ardhshme muzikore, kanë ndikuar negativisht te frymëzimi i saj.

“Dua t’ju kërkoj falje të gjithëve që më shkruani e prisni të lançoj projektet e premtuara, por t’ju them të drejtën dhe të tregohem shumë e sinqertë, nuk më vjen frymëzimi në asnjë moment,” shkruan ajo shoqëruar me një emoji të trishtuar.

Ju kujtojmë që pas zhvendosjes në Zelandën e Re të çiftit Big Basta-Vesa Luma dhe vogëlushit Lian, këngëtarja dhe i biri u rikthyen sërish në Prishtinë, pasi siç Vesa rrëfeu në “Në Kurthin e Piter Pan” në prill të këtij viti, ka në plan të realizojë disa recitale në Shqipëri dhe Kosovë, e më pas të largohet për në Zelandë, pa pengje.

“Besoj janë shumë faktorë që po ndikojnë në këtë gjendjen time,” shkruan Vesa në Instagram. “Nga fillimi i jetës së re për të cilën tashmë jeni në dijeni, e deri tek mundimi i madh për të kuptuar tendencat e çuditshme shqiptare që të japin një ‘presion’ për të nxjerr nga 10 këngë në vit, investime të cilat barazohen me 0, ngaqë 98% të rasteve as që do të mbahen mend vitin tjetër e lëre më të jetojnë gjatë.”

Më pas, Vesa shton se “gjithë jetën ka jetuar dhe është frymëzuar nga muzika”, por siç duket këngëtarja nuk do që të përfshihet nga euforia e të përsërisë veten. “Dua të gjej një ekuilibër mes gjithë këtyre gjërave që nuk është e lehtë për mua, por është tepër e rëndësishme të gjej drejtimin e duhur, për t’i vënë gjërat aty ku duhet të jenë, me profesionalizëm e dashuri.”

“Faleminderit që shtoheni çdo ditë e më shumë, pavarësisht ‘hallakatjeve’ të mendjen sime për momentin. Do të mundohem mos t’ju zhgënjej,” përfundon ajo.

Në një tjetër postim, mesa duket Vesa tregon se do t’i bashkohet Bogdos dhe Tatum.