NGL (Not Gonna Lie) është më i fundit në një varg të gjatë aplikacionesh të mesazheve anonime. Ky aplikacion i lejon përdoruesit të marrin mesazhe anonime përmes një lidhjeje me link në biografinë ose Story-t e tyre në Instagram. Anonimiteti ofron disa mundësi për të thënë gjëra që s’do i thonit kurrë me emrin tuaj apo mendime që nuk do dëshironit t’i shprehni në publik. Gjithashtu mund ta përdorni për t’i thënë dikujt se e pëlqeni ose jo.
Duke patur parasysh ngjarjet e viteve të fundit, nuk është për t’u habitur se si paska patur kaq shumë emocione “anonime”, që thjesht prisnin të shpërthenin.
Çfarë mund të shkojë keq?
Jemi në fazën më të mirë për NGL. Vëmendja inkurajon më shumë njerëz ta shkarkojnë aplikacionin dhe të eksperimentojnë. Eksperimentimi me aplikacione të reja është në rregull dhe madje mund të jetë argëtues. Mund të krijojë një hapësirë ??për të shprehur të vërtetën tuaj. Por mund të jetë gjithashtu shqetësues dhe fyes.
NGL aktivizon cënueshmërinë tonë qenësishme ndaj opinioneve të të tjerëve. Ne të gjithë kërkojmë miratim social dhe lidhje/marrëdhënie/ ndërveprim (connections) me të tjerët. Është thelbësore për shëndetin tonë mendor dhe fizik. Por anonimiteti përjashton lidhjen reale. E vetmja fuqi që kanë mesazhet anonime është ajo që ju u jepni atyre. Anonimët mund t'ju bëjnë të ndiheni mirë me veten nëse i merrni për zemër. Megjithatë, nëse u jepni atyre autoritet – ata mund t’ju bëjnë të ndiheni edhe shumë keq!
Nëse i lejoni fjalët e të huajve të ndikojnë në mënyrën se si ndiheni për veten tuaj, çfarë ndodh kur ato fjalë janë të liga, kritike ose me një gjuhë urrejtjeje?
Njerëzit kanë një paragjykim të lindur negativ - një tendencë për t'u kushtuar më shumë vëmendje reagimeve negative sesa atyre pozitive.
Provat e neuroshkencës tregojnë se stimujt negativë krijojnë më shumë aktivitet të trurit që në moshën një vjeçare (Hibbing et al, 2014). Kështu, sjelljet dhe qëndrimet priren të ndikohen më shumë nga e keqja sesa nga e mira, qofshin këto lajme, përvoja ose mënyra se si i shihni njerëzit. Truri i ri është veçanërisht i prekshëm ndaj miratimit social dhe reagimet negative mund të ulin vetëvlerësimin e adoleshentëve dhe të rinjve.
Fyerjet anonime janë, fatkeqësisht, forma më e zakonshme e sulmit në mediat sociale me pasoja negative të dokumentuara.
Përtej potencialit për dëmtim psikologjik, këto lloj aplikacionesh promovojnë, qoftë edhe pa qëllim, një normë sjelljeje të papërgjegjshme.
Burimi: Psychology Today
