Pas dinamikave të fundit brenda dhe jashtë shtëpisë së Big Brother për marrëdhënien e Mirit dhe Selinit, këngëtarja Anjeza Shahini ka publikuar një deklaratë të gjatë në mbrojtje të Mirit.
(Në sy bie fakti se ajo dhe Miri ndajnë të njëjtin mbiemër, gjë që të kthen te lajmi i para disa viteve se dyshja janë kushërinj të parë, ama deri në momentin e publikimit të këtij artikulli, Anjeza nuk e ka konfirmuar ose mohuar këtë aludim për Anabel.)
Në deklaratën e saj, Anjeza Shahini e përshkruan Mirin si një njeri që ende beson se njerëzit nuk shpifin, nuk paguajnë për komente të shëmtuara dhe nuk organizohen për të shkatërruar imazhin e dikujt publikisht. Një besim që, sipas saj, bie ndesh me realitetin brutal të ekspozimit mediatik dhe gjykimit masiv që shoqëron formatet televizive.
"20 ditë përpara se Miri të futej në Big (ku unë nuk doja, sepse ndryshe nga unë, Miri ende beson në dashamirësinë e fuqive mediatike), më tha: 'Nuk dua as mbështetje, as ndihmë. Nëse njerëzit do më duan për atë që jam, dua të votohem për atë që jam.'
Kaq i drejtë është Miri. Akoma mendon se njerëzit nuk shpifin, se njerëzit nuk paguajnë për komente të shëmtuara, se njerëzit nuk bëjnë komplote për ta denigruar një qenie njerëzore deri në palcë."
Më tej, këngëtarja ndalet tek akuzat e rënda që i janë bërë Mirit nga babai i Selin, duke e quajtur të padrejtë dhe të rrezikshëm etiketimin e tij si “pervers”.
"Miri që sot zihet dhe nesër sigurohet që nuk ka humbur një shok; Miri që të pyet para se të të përqafojë; Miri që vendos veten në rrezik për të mbrojtur më të dobëtit, sot akuzohet nga një prind i një vajze të rritur, e cila është po aq e përfshirë në një lojë sa edhe Miri, si një “pervers”.
Nuk kanë faj, sepse 'perversë' ka shumë, por ata nuk dalin në Big Brother; ata i keni në shtëpi, duke bërë si burra të ndershëm, nga ata me 'namus'. Miri është rritur me dashuri; ai jep shumë dashuri, dashuri të sinqertë, nga ajo që është harruar nga shumëkush.
Të etiketosh një njeri me zemër të artë si Miri me epitete të tilla është kriminale dhe për këtë shpresoj që Miri të ketë hapësirë të marrë masa të duhura një ditë."
Ajo thekson se bëhet fjalë për një lojë televizive, ku të gjithë të përfshirët janë të rritur dhe të vetëdijshëm për dinamikat e saj, ndërsa linçimi publik, sipas saj, po kalon çdo kufi njerëzor. Deklarata mbyllet me një mesazh për Mirin, të cilin ajo e inkurajon të ketë durim, duke shprehur bindjen se e vërteta dhe pastërtia e karakterit të tij do të dalin në pah me kohën.
