Një stuhi akuzash po trondit prej ditësh botën e televizionit italian dhe reality show-n “Grande Fratello”. Në qendër të skandalit është Alfonso Signorini, gazetar dhe prezantues i programit, i cili është nën hetim nga Prokuroria e Milanos për abuzim seksual dhe zhvatje.
Lajmi u përhap fillimisht në media si një thashethem, por tashmë ka marrë formë zyrtare: Signorini është regjistruar si i dyshuar pas një kallëzimi pak para Krishtlindjeve nga Antonio Medugno, ish-konkurrent i reality show-t.
Si nisi gjithçka: akuzat dhe “sistemi” i përfolur
Gjithçka nisi me deklaratat e Fabrizio Corona-s, i cili në programin e tij në YouTube, “Falsissimo", foli për ekzistencën e të ashtuquajturit “sistemi Signorini”. Sipas Corona-s, për vite me radhë ka funksionuar një mekanizëm i fshehtë ku disa të rinj kanë përfituar hyrjen në “Grande Fratello” në këmbim të favoreve seksuale.
Corona ka pretenduar se ky sistem ishte i strukturuar dhe i përsëritur në kohë dhe përfshin qindra persona në harkun e rreth dhjetë viteve. Një nga emrat që u përmend publikisht ishte ai i Antonio Medugno-s, 27-vjeçar, ish-konkurrent i programit.
Medugno fillimisht rrëfeu në “Falsissimo” se në vitin 2021 kishte qenë i ftuar në apartamentin e Signorini-t, ku, sipas tij, kishte përjetuar afrime të padëshiruara. Më pas, ai vendosi të formalizojë akuzat, duke depozituar një kallëzim për dhunë seksuale dhe zhvatje.
Pas shpërthimit të polemikave, Signorini reagoi duke njoftuar se ishte vetëpezulluar nga Mediaset. Vendimi u komunikua nga avokatët e tij si një masë “parandaluese” dhe u pranua nga kompania televizive.
Ai është paraqitur vullnetarisht para prokurorëve të Milanos. Gjatë rreth tre orësh marrje në pyetje, ai mohoi kategorikisht çdo akuzë për abuzim seksual, duke deklaruar se gjatë gjithë karrierës së tij ka vepruar me profesionalizëm dhe korrektësi.
Sipas versionit të tij, nuk ka ekzistuar kurrë asnjë “sistem”, por bëhet fjalë për një fushatë të organizuar shpifjeje, e cila, sipas tij, është ndërtuar kryesisht nga Fabrizio Corona për interesa ekonomike. Ai ka deklaruar se kjo fushatë i ka shkaktuar dëme të rënda reputacionit dhe synon ta shkatërrojë personalisht dhe profesionalisht.
Avokatët e tj e kanë konsideruar kallëzimin “një rindërtim absurd të fakteve” dhe kanë akuzuar denoncuesit se janë të gatshëm “të shkatërrojnë jetën e të tjerëve për përfitime financiare”.
Ndërkohë, Antonio Medugno ka treguar sërish versionin e tij në rrjetet sociale. Në një video në Instagram, ai ka deklaruar:
“Nuk kam pasur kurrë marrëdhënie seksuale me Signorini-n. Gabimi im ishte se lashë hapësirë për një afrimitet që nuk duhej ta pranoja. Kur je i ri, ke frikë të humbasësh mundësitë profesionale dhe je nën presion të madh. Në atë moment u besova verbërisht këshillave të ish-menaxherit tim dhe minimizova gjithçka.”
Çfarë pritet tani?
Hetimet janë ende në fazë paraprake dhe Prokuroria e Milanos po vlerëson versionet e palëve. Ndërkohë, rasti ka ndezur një debat të fortë publik mbi pushtetin, abuzimin dhe prapaskenat e botës së spektaklit italian, me pyetje që mbetet ende pa përgjigje.
