Foto: Janis Mazuch
Filmi “Shame and Money”, me regji të Visar Morinës, ka shënuar një sukses të jashtëzakonshëm në arenën ndërkombëtare, duke fituar World Cinema Grand Jury Prize – Dramatic (filmi më i mirë dramatik ndërkombëtar) në Sundance Film Festival 2026.
Ky çmim prestigjioz përfaqëson një moment të rëndësishëm për kinematografinë në Kosovë. “Shame and Money” u shpall fitues në kategorinë World Cinema Dramatic Competition, duke u veçuar nga juria për rrëfimin e tij të fortë emocional dhe qasjen e thellë sociale.
Filmi, me skenar të Visar Morinës dhe Doruntina Bashës, rrëfen historinë e një familjeje fermerësh nga Kosova që përballet me zhvendosjen e dhimbshme drejt qytetit dhe me realitetet e ashpra ekonomike, duke trajtuar tema si varfëria, dinjiteti, turpi dhe varësia nga ndihma e të afërmve.
Në role kryesore interpretojnë Astrit Kabashi dhe Flonja Kodheli, të cilët janë vlerësuar për interpretimet e tyre të fuqishme. Aktorë të tjerë në film janë Kumrije Hoxha, Abdinaser Beka, Fiona Gllavica, Alban Ukaj, Tristan Halilaj etj.
The Hollywood Reporter e ka cilësuar filmin si “një dramë e ngadaltë, e ndërtuar me kujdes dhe e interpretuar bukur”, duke theksuar forcën regjisoriale të Visar Morinës dhe ndikimin emocional të historisë.
Fitorja në Sundance përforcon pozitën e “Shame and Money” si një nga filmat më të rëndësishëm ballkanikë të viteve të fundit dhe hap rrugën për prezantime të reja në festivale ndërkombëtare, si dhe për shpërndarje më të gjerë globale.
Sundance Film Festival konsiderohet si festivali më i madh dhe më prestigjioz i filmit të pavarur në botë. Aty prezantohen filma autorë, jo prodhime komerciale të Hollywood-it. Më parë, Sundance ka zbuluar edhe regjisorë dhe aktorë të mëdhenj dhe fitimi i një çmimi në Sundance konsiderohet arritje shumë e lartë.
