Reperi A$AP Rocky njoftoi gjatë një interviste për revistën Esquire, se po konsideron mundësinë për të kandiduar për kryebashkiak në qytetin e New York-ut.
“Në 2029-n, votoni për kryetarin e bashkisë. Votoni për Rocky-n," tha ai kur u pyet nëse dëshironte të kandidonte për kryetar bashkie në një të ardhme.
Kjo pyetje erdhi pasi ai shprehu dëshirën për t'u bërë pjesë e politikës, madje ka besimin e plotë se do t'i përshtatej këtij roli më së miri.
“Mendoj se do ia dilja shumë mirë sepse jam një njeri që i përfaqëson njerëzit.”
Nëse ai do ta bënte këtë, do t'i duhej të konkurronte përballë kryebashkiakut aktual, Zohran Mamdani-t. Ky i fundit në të shkuarën ka qenë për fare pak kohë pjesë e botës së artit, dikur njihej si reperi Mr. Cardamom.
Edhe pse nuk ka ndërmarrë ende hapa konkretë, A$AP Rocky ndoshta e di se ku do t'i duhej të investonte më së shumti nëse vendos të kandidojë.
“Shih gropat në rrugë, riparoji. Çmimi i trenave sapo u rrit me 3 dollarë, është çmenduri."
Sipas tij, çmimet janë rritur shumë dhe është e nevojshme të krijohen vende të reja pune dhe të ofrohet një kujdes sa më i mirë shëndetësor për qytetarët.
Kjo deklaratë e reperit vjen vetëm disa javë pas fillimit të administratës së Zohran Mamdani-t, madje i gjithë rrëfimi i tij ktheu vëmendjen tek ajo çfarë u besua se paralajmëroi përmes albumit "Don't Be Dumb" mbi një kandidaturë të mundshme, pak vite më parë.
Por, e gjitha kjo mbetet thjesht një aludim, pasi reperi nuk konfirmoi asgjë mbi të, madje përpos këtij pasioni të papritur mbi politikën, emri i kryebashkiakut aktual të New York-ut nuk u përmend prej tij gjatë intervistës.
Por, le të përqendrohemi për pak te një e ardhme me reperin kryetar bashkie. Kjo do ta bënte Rihanna-n Zonjën e Parë të New York-ut dhe për fansat e saj, ky do të ishte një lajm i madh.
