Instagram/Bieta Sulo

Autorja dhe moderatorja e emisionit “Ftesë në 5”, Bieta Sulo, ka përgënjeshtruar lajmet e publikuara ditët e fundit, ku raportohej se ajo do të largohet nga Top Channel.

Në nisje të emisionit këtë pasdite, ashtu sikurse kishte paralajmëruar për redaksinë tonë, Bieta reagoi duke thënë:

“Një tjetër lajm shumë i diskutuar i fundjavës ka qenë largimi i Bieta Sulos nga Top Channel. Aq sa dhe njerëz shumë të afërt më shkruanin: ‘Çfarë po ndodh?’ Lajmi merr dhenë dhe besohet edhe nga njerëz të afërt në përmasa të tilla. Madje dhe punëtorët e skenografisë kur erdha sot më thanë: ‘A ta vazhdojmë këtë punë?’

Ka zierë rrjeti për këtë gjë, por që këtu do të jem në Top Channel. Përkon me 20 vitet e mia ne Top Channel, dhe në këtë 20 vjetor, jo vetëm që do të jemi nga shtatori së bashku, por është duke u punuar për një skenografi të re për të ardhur në një sezon të ri televiziv me më shumë energji dhe vrull, pas 7 vitesh të suksesshme që kemi lënë pas”, u shpreh ajo.

Prej disa ditësh, në disa portale online qarkulloi lajmi se sezoni aktual mund të jetë i fundit për Bieta Sulon si moderatore dhe autore e emisionit “Ftesë në 5” në Top Channel. Sipas këtyre burimeve, ajo do të zhvendosej në Radio Televizionin Shqiptar sezonin e ardhshëm televiziv.

Por, të tilla raportime janë hedhur poshtë nga ky reagim i autores dhe moderatores.

Bieta Sulo është moderatorja më jetëgjatë në këtë fashë orari në Top Channel, duke sjellë qëndrueshmëri në një segment që për vite me radhë kaloi nëpër ndryshime të shpeshta. “Ftesë në 5” ka sot një identitet të qartë editorial dhe stil komunikimi të konsoliduar.