Prej disa ditësh, në disa portale online po qarkullon lajmi se sezoni aktual mund të jetë i fundit për Bieta Sulon si moderatore dhe autore e emisionit “Ftesë në 5” në Top Channel. Sipas këtyre burimeve, Bieta mund të zhvendoset në Radio Televizionin Shqiptar.

Spekulimet për largimin e saj janë shoqëruar edhe me aludime për një pasuese të mundshme: këngëtarja dhe moderatorja Rozana Radi përflitet si emri që mund të marrë drejtimin e programit të pasdites, nëse Bieta largohet.

Në përpjekje për të verifikuar lajmet në fjalë, redaksia e Anabel.al kontaktoi drejtpërdrejt me Bieta Sulon, duke respektuar standardet tona të raportimit të balancuar dhe korrekt. Në një përgjigje për Anabel, Bieta u shpreh:

“Përshëndetje! Faleminderit dhe e vlerësoj shumë që më shkruajtët. Unë do bëj një reagim për këtë çështje sot në emision.”

Me këtë deklaratë, mbetet për t’u parë nëse reagimi i saj do të përgënjeshtrojë thashethemet apo do të konfirmojë nisjen e një kapitulli të ri në karrierën e saj televizive.

Bieta Sulo është moderatorja më jetëgjatë në këtë fashë orari në Top Channel, duke sjellë qëndrueshmëri në një segment që për vite me radhë kaloi nëpër ndryshime të shpeshta. “Ftesë në 5” ka sot një identitet të qartë editorial dhe stil komunikimi të konsoliduar.