Sot, 1 janar 2019. Vit i ri, gjëra të reja…shpresojmë!
Dita e parë e vitit është përgjithësisht shumëëë e mërzitshme. Disave u dhemb koka nga pija e një nate më parë; disa ndihen të fryrë nga ushqimet; disa duan thjesht gjumë, ndërsa disa të tjerëve u duhet të punojnë. Ok, qartë!
Megjithatë, siç e thamë më sipër: Vit i ri, gjëra të reja! Kështu që në vijim po ju paraqesim disa veprime që mund t’i merrni në konsideratë për ta nisur vitin mbarë dhe me energji!
1.Hiqni zbukurimet e tepërta në shtëpi.
E di, gjëja më stresuese në botë. Megjithatë është koha që ta përgatisim veten se atmosfera mbaroi dhe përditshmëria do t’i kthehet realitetit. Zakonisht tradita e do që pema e Vitit të Ri të hiqet në datë 6 janar, por me zbukurimet e tjera mund të nisni punë paraprakisht.
2.Bëni një pastrim të shpejtë rreth e rrotull.
Mos e mundoni shumë veten, mjafton të pastroni pak sallonin dhe kuzhinën. Gjithashtu ndryshoni vendet e kolltuqeve, shtroni mbulesa në ngjyra të tjera për të sjellë një pamje më të freskët.
3.Nëse keni kohë, rregulloni dollapin tuaj.
Okkk, ngjan shumë e mërzitshme si ditë, por kjo gjë do t’ju ndihmojë të shihni se çfarë mungon në garderobë, ku duhet të investoni pasi të merrni rrogën e radhës e kështu me pak fjalë.
Nga ana tjetër, mund të gjeni veshje që s’ju duhen më, të cilat mund t’i falni tek ata që kanë nevojë. Rrugës nëpër Tiranë ka plot kabina të verdha që janë posaçërisht për këtë punë. Ndihuni mirë vetë dhe bëni dikë tjetër të ndihet mirë.
4. Sistemoni telefonin, kompjuterin, emailin, Facebook-un etj.
Një rrëmujë e madhe. E kuptoj: mesazhe dhe urime të shumta për festa; grupe në WhatsApp ku ti nuk e kupton kush të futi dhe pse; një lëmsh dosjesh në desktop; ke njerëz në Facebook që nuk ia ke haberin se kush janë... Gjeni pak minuta kohë dhe ndihuni më të rregullt.
5.Rezervo një takim me mjekun.
Pjesa më e madhe e njerëzve nuk ushqehen shëndetshëm me rastin e festave të fundvitit. Të mos flasim pastaj për problemet shëndetësore që i kanë anashkaluar gjatë gjithë vitit. Prandaj një vizitë te mjeku është e domosdosshme.
6.Nisni të mendoni për një pasion të ri.
Mund të bëhet fjalë për çdo gjë – të mësosh një gjuhë të huaj, të shkosh në kurse noti, të vraposh gjatë fundjavave, të nisësh të lexosh më shumë libra, të shohësh tutorial në YouTube, palestër, karate etj, etj, etj. Do të keni një vit para për të përmirësuar aftësitë në pasionin e ri.
7.Mendoni për një artist të ri të preferuar.
E keni parasysh ato këngët që ju shoqëruan për muaj me radhë? Harrojeni. Gjeni këngë të tjera dhe fiksohuni.
Përshtatur nga Bustle*
