Në Tiranë ke ndjesinë se po jeton në qytetin më të rrëmujshëm në botë. Megjithatë, kur pastaj shikon sa bukur dalin në foto vendet ku kalon çdo ditë, fillon ta shikosh me sy tjetër.
Këto vende me siguri i njihni, por ndoshta akoma s’e keni shkrepur foton e duhur aty. Çdo gjë varet nga këndi dhe drita dhe këtë, blogerët me përvojë e dinë. Këto foto të marra në Instagram janë shkrepur në disa nga vendet më të zakonshme për këdo që jeton në Tiranë, por s’ua ka fajin njeri nëse i shpërfillni.
Tek ish-Fusha e Aviacionit
Kjo lagje mund të jetë shumë e betonizuar, por hapësira e gjerë pa pallate që ka dhe strukturat e mbetura nga fusha e aviacionit, krijojnë një sfond shumë interesant për foto.
Ky muri përballë Librit Universitar
Mes dy pallateve në blloqet përballë Librit Universitar, janë dy mure të pikturuar me zemra të kuqe, që shërbejnë si sfond për fotot e dhjetëra njerëzve në Instagram.
Tek Vëllezërit Frashëri
Tek parku i njohur si “Vëllezërit Frashëri” për shkak të busteve të vëllezërve Frashëri, ka shumë sfond për foto tani që muret janë lyer me ngjyra të ndezura dhe përveç kësaj, ka edhe gjelbërim.
Tek sheshi Skënderbej
Sheshi i ri “Skënderbej” del bukur në foto. Pllakat në ngjyrë bezhë, e gjelbra e pemëve dhe e verdha e ministrive krijojnë një kombinim të këndshëm për aparatin.
Tek Reja
Reja është subjekti i preferuar në Tiranë i të rinjve shqiptarë, kur duan të bëjnë foto. Veçanërisht natën, kur dritat shkëlqejnë pllakat e tejdukshme si akull, në foto ngjan si të jesh në mes të një ajsbergu high tech.
Tek Banka
Shatërvani prapa Bankës së Shqipërisë mund të duket zgjedhja më klishe në botë, por pyesni fotografët dhe blogerët: është këndi i përsosur për një foto kur vishesh shik dhe klasike.
Rrugët e ish-Bllokut
Lokalet e famshme, makinat e parkuara njëra pas tjetrës dhe njerëzit që kalojnë orë të tëra duke pirë kafe janë sfondi më i mirë për një foto urbane në stil tiranas.
Tek Universiteti
Sfondi që nuk vdes kurrë. Natën po ashtu, një diamand gjigand në mes të qytetit.
Kabinat kudo nëpër qytet
Janë një prej elementeve më interesante të Tiranës kohëve të fundit. Shumica e kabinave kanë të pikturuara mbi to plot ngjyra imazhet më të famshme të shekullit të kaluar dhe të riut, si Alex i “A clockwork orange” apo Homer Simpson.
Ura e Tabakëve
Sa i nëvlerësuar është ky vend. Përveçse ka vlerë historike, ka edhe një pamje shumë interesante për foto, për shkak të neutralitetit të ngjyrës së tullave që kombinohet me të gjelbrën e ndezur të barit. Gjatë dimrit kur gjelbërimi vyshket, merr pamjen e diçkaje krejt të vjetër, një perlë për ata që pëlqejnë fotografinë minimaliste.
Copyright Anabel.al / Ndalohet ribotimi pa lejen e redaksisë.
