Marka Guess Marciano e ka përcaktuar kështu imazhin e vet të ri, Belen Rodriguez: Ikona Moderne. Fama për modelen argjentinase nuk është diçka e re; prej 8 vitesh në Itali ajo kryeson personazhet më të përfolur të show biz-it. Por si u kthye ajo nga figura e një vajze të bukur dhe shumë kontroversiale, në një ‘ikonë moderne’?
Takimi me Paul Marciano-n, themeluesin legjendar të Guess-it, ka qenë një rastësi e mrekullueshme, siç kanë treguar ata. Gjatë qëndrimit disa ditor në Itali, Paul po bënte zapping nëpër ekranet televizive kur, ndaloi pa e vënë re në një talk show dhe në ekran u shfaq Belen-i, duke e lënë Paul-in të mahnitur:
‘Duke bërë zapping përfundoj në një talk show dhe shfaqet ajo: me flokët të mbledhur në majë të kokës, një xhaketë të ngushtë, pak grim. Mbetem pa fjalë. Të nesërmen e marr në telefon por ajo nuk fliste as anglisht, as frëngjisht, e unë nuk di as italisht e as spanjisht’
Kështu, pasi ishin marrë vesh me anë të një përkthyesi, Paul Marciano i kishte bërë Blen Rodriguez-it propozimin që ndryshon jetën e çdo modeleje: për t’u bërë imazhi i Guess-it në botë. Prej disa dekadash, Guess ka kthyer shumë modele të reja por ende të panjohura, në ‘ikona moderne’ të bukurisë. Claudia Schiffer, Laetitia Casta, Kate Upton apo Irina Shayk, e kanë pasur bum-in e tyre kur Marciano i zgjodhi si imazh të markës së tij.
‘Në Itali ajo është shumë e njohur’, thotë ai, ‘Por në Amerikë dhe në Azi, përpara kësaj fushate, askush nuk e njihte. Kam zgjedhur gjithmonë modele të panjohura sepse, nëse janë tashmë të famshme, ndihem se nuk mund të bëj asgjë më shumë për to’
Stilisti i njohur flet për Belen-in më shumë sesa thjesht si për një imazh, si për një muzë, duke e krahasuar atë me Sophia Loren:
‘Më kujtove Sophia Loren-in, e cila për mua është femra më e bukur e të gjitha kohërave’, i drejtohet Marciano-ja Belen-it, ‘Kur e kam njohur atë, më tha ‘pasuria ime ka qenë që linda e varfër’. Sophia çmon çdo çast të jetës së saj. fiton Oscar? Është e lumtur. Bën makarona? Prapë është e lumtur. Është e vërtetë. Edhe ti, Belen, je e vërtetë. Ah, sa do të doja të isha më i ri!’
Burimi: Il Corriere/ Përgatiti: Genta Hodo
