Ministrja shqiptare e Mbrojtjes, Mimi Kodheli, është bërë objekt sulmi në një artikull të publikuar nga portali grek “militaire.gr”, specializuar rreth informacioneve mbi sigurinë. Sipas gazetës ‘Panorama’, në publikimin e tyre, ata shkruajnë mes të tjerash se Kodheli është shumë e interesuar në çështjet e grave që kalojnë vështirësi dhe dalin në krye, dhe kjo jo rastësisht.
“Para 25 vitesh, ajo ishte një balerinë e bukur që punonte në Syngrou Avenue", kujton Christos Capuço, "Më pas shkoi për studime në SHBA ku kreu doktoratë për Marrëdhënie Ndërkombëtare. Pasi u angazhua në politikë, sot ajo është ministre e Mbrojtjes në shtetin fqinj”.
Media greke shkruan më tej se Kodheli, si një grua e edukuar, duhet ta dijë shumë mirë se çamët kanë bërë çdo gjë kundër grekëve në periudhën e pushtimit nga nazistët. “Kodheli gjithashtu duhet ta dijë mirë që vendi i saj nuk mund të jetë kërcënim ushtarak për asnjë vend në rajon”, shkruhet më tej.
Në shkrim nënvizohet se Shqipërisë nuk mund t’i vijë në ndihmë as Turqia, kur ajo të kthehet në një vrimë të zezë në hartë. “Ishte Greqia që hapi kufirin dhe pagoi një kosto të lartë nga rrëzimi i sistemit totalitar”, thuhet në shkrim duke kujtuar pritjen e mijëra emigrantëve shqiptarë pas viteve 1990.
Burimi: Panorama
